50 жас кәсіпкер Қарағанды облысы әкімінің грантын алды
Қарағандыда ŪSTANYM'23 өңірлік жастар форумында бастаушы кәсіпкерлерге облыс әкімінің гранттары табыс етілді. Әлеуметтік маңызы бар 50 жобаның авторлары екі миллион теңгеге сертификат алды.
ŪSTANYM'23 өңірлік форумы Қарағандыда 600-ден астам белсенді жастар өкілдерін жинады. Олар үшін үш бағыт бойынша форсайт-сессиялар, "Қаржылық сауаттылықты қалай арттыруға болады?" тақырыбында лекция ұйымдастырылып, бір жылғы жұмысты талқылау және қорытындылау өтті.
Жиналғандарды өңір басшысы Ермағанбет Бөлекпаев құттықтады.
– Біздің өңірдің әлеуеті зор. Әңгіме тек табиғи байлық туралы емес, бұл, ең алдымен, сіздер, жігіттер мен қыздар, энергияға, идеялар мен амбицияларға толы әлеует, – деп атап өтті Ермағанбет Бөлекпаев. – Мұнымен тоқтамаңыздар, жаңа көкжиектерді іздеңіздер және тәуекелге барудан қорықпаңыздар! Әрқашан естеріңізде болсын, сіздердің әрқайсыларыңыз бірегейсіздер және бұл сіздердің қоғамдағы ең жақсы өзгерістерге әкелетін ерекше жолдарыңыз.
Жастар бизнесін қолдау мен дамытуға арналған гранттар конкурсына 18–34 жас аралығындағы (қоса алғанда) ісін жаңа бастаған немесе жұмыс істеп жүрген кәсіпкерлер қатысты. Жеңімпаздарды іріктеу кезінде мемлекеттік органдардың, мәслихаттардың, өңірлік кәсіпкерлер палатасының, ғылыми-білім беру мекемелерінің, бизнес-қоғамдастықтар мен кәсіпкерлердің өкілдері кірген комиссия жоба идеясының өзіндік ерекшелігін, тауарға немесе қызметке нарықтық сұранысты, жаңа жұмыс орындарын құру әлеуетін және т. б. ескерген.
34 жастағы Рахат Жақыпов – облыс әкімінің грант иегерлерінің бірі. Ол инсульттан кейінгі және тірек-қимыл аппараты проблемалары бар адамдарға арналған сауықтыру орталығын ашу жобасын ұсынды. 10 жылдан астам уақыт бойы Рахат медициналық орталықта ЕДШ нұсқаушысы болып жұмыс істеді, шетелде біліктілікті арттыру курстарында өз білімін жетілдірді.
– Емдік дене шынықтыру ғажайып нәтижелер көрсете алады. Бірнеше жылда мен дұрыс таңдалған жаттығу терапиясы бағдарламасының көмегімен адамдар қайтадан жүре, жүгіре, секіре бастағанын байқаймын. Бұл әртүрлі жарақаттар мен инсульттан кейін қол жетімсіз болатын қарапайым дағдылар, – дейді Рахат Жақыпов. – Мен өз орталығымда адамдарға көмектескім келеді, оларды аяғына тұрғызғым келеді. Қазірдің өзінде менің үйіне баратын 10 тұрақты клиенттерім бар. Енді олар қызметтерді ыңғайлы жағдайда ала алады. Үй-жай әлі табылған жоқ, бірақ менің жинақтарым мен гранттық қаражатым бар, мен оны жабдықтар мен арнайы құрылғыларды сатып алуға жұмсай аламын. Болашақта мен көмекшілерді жұмысқа алғым келеді.
Гранттың тағы бір иегері – Саран қаласының тұрғыны Анар Ғизатулина. Білімі бойынша мұғалім екі бала тәрбиелеп отыр, кенжесі ерекше. Бұл жайт оны түзету кабинетін ашу идеясына итермелеген.
– Грант мен үшін жақсы ынталандыру болды. Осы қаражатқа мен Монтессори жүйесін, логопедиялық үстелді және түзету кабинеті үшін басқа да қажетті жабдықты сатып аламын. Менде төрт маман жұмыс істейді, – дейді Анар Ғизатулина. – Саранда түзетуді қажет ететін балалар көп. Бізде мемлекеттік психологиялық-педагогикалық түзету кабинеті бар, оған балалар ПМПК жолдамасы бойынша кіре алады. Біздің кабинет диагноз қойылғанға дейін оларға көмек көрсетуге дайын. Бұл ата-аналардың кеңестері, психологпен, логопедпен сабақтар және т. б. Әр бала үшін жеке жоспар жасалады. Күніне біз 4–5 баланы қабылдауға дайынбыз.
Жыл соңында аймақтың 50 жас тұрғыны жаңа бизнес құруға немесе бұрыннан бар бизнесті кеңейтуге мүмкіндік алды. Олар Қарағанды мен облыс аудандарында бояу цехын, рольштор тігу және жалюзи жасау салонын, саз шеберханасын, спорттық би және гимнастика мектебін ашуға, синтетикалық жуғыш заттар, термопанельдер өндірісін бастауға, қабырғаларды бояу және мурал жасау бойынша шеберлердің жұмысын алға жылжытпақшы.
Форум соңында жастардың белсенді өкілдеріне ҚР Мәдениет және ақпарат министрлігінің алғыс хаттары табысталды.
