Қарағандылықтар голболдан Қазақстан чемпионы атанды

Қазақстанда алғаш рет 21 жасқа дейінгі жасөспірімдер мен қыздар командалары арасында голболдан республикалық чемпионат өткізілді. Ол Астанада өтті. Елорда, Алматы және бес облыстың ерекше спортшылары бақ сынасты. Жастар арасында бірінші орынды қарағандылықтар иеленді.

"Басты қарсыластар алматылықтар болды. Бірақ қарағандылықтар мықты күресте оларды жеңе алды. Осындай нәтижеден кейін біздің спортшыларымыздың алдағы жылы жастар ұлттық құрамасына кіріп, халықаралық алаңдарда ойнауға барлық мүмкіндігі бар", – деп атап өтті Қарағанды облысының дене шынықтыру және спорт басқармасы.

Арнайы спортшылар жаттықтырушы Елена Асланованың басшылығымен жаттығады.

Осы жылдың мамыр айында Қарағанды облысының голбол командасы алғаш рет ҚР Паралимпиада ойындарында өнер көрсетті. Дебют сәтті өтті-олар қоланы жеңіп алды. Енді міне, жаңа шың!

Голболдан еліміздің алғашқы жастар чемпионатын Қазақстан голбол федерациясы ҚР Спорт комитетімен және мүмкіндігі шектеулі жандарға арналған спорттық дайындық орталығымен бірлесіп өткізді. 

Голбол – көру қабілеті нашар адамдарға арналған спорт түрі. Ойынға үш адамнан тұратын команда қатысады. Спортшылар қарсыластың қоңырауы бар қақпасына допты лақтыруы керек.