Қарағандыда "Жаңа есімдер – 2023" байқауының жеңімпаздары анықталды

Қарағанды Достық үйінде жыл сайынғы "Жаңа есімдер" байқауының қорытындысы шығарылды. Қаламыздың жылдан жылға жақсаруға септігін тигізетін қарағандылықтар құрметке ие болды.

Іс-шара 16-шы рет өткізілуде. Осы жылдар ішінде 500-ден астам қала тұрғыны қоғамдық ілтипатқа ие болды. Байқаудың бұрынғы атауы – "Замандас". Аты өзгергеніне қарамастан, оның мақсаттары мен міндеттері өзгеріссіз қалды.

– Басты мақсат – әр түрлі саладағы еңбек адамдарын құрметтеу. Бұл спорт, мәдениет, халықты әлеуметтік қорғау, коммуналдық сала және т.б. Әр жылдары номинациялар өзгерді. Биыл біз алты бағыт бойынша марапаттадық. Лауреаттарды Қарағанды мемлекеттік мекемелерінің басшылары мен қоғам қайраткерлерінен құралған кәсіби қазылар алқасы анықтады. Номинациялардың әрқайсысында 3–4 үміткер лайық болды, – дейді Қарағанды облысы кәсіпкерлер қауымдастығының атқарушы директоры Серік Санаубаев.

Номинанттардың әрқайсысы туралы бейнеролик түсіріліп, сайтына орналастырылды, онда жеңімпаздарды халық анықтады. Биылғы жылы дауыс беруге 17 мыңнан астам адам қатысты.

Бұқаралық спортты дамытуға белсенді қатысқаны үшін "Батыр" номинациясының иегері Аян Әмзе болды.

Жұмыспен қамту, әлеуметтік қызметтер және халықты әлеуметтік қорғау саласындағы жетістіктері үшін "Мейірімділік" номинациясында Анар Ассалауова жеңіске жетті.

– 2012 жылдан бастап мен әлеуметтік қызметкер болып жұмыс істеймін. Мен үшін конкурста жеңіске жету - менің қызметімнің кезекті кезеңінің басталуына күшті серпін. Бұл сіздің жетістіктеріңізді көрсету, мүмкіндіктеріңізді бағалау, басқалардың деңгейін көру және есту, шығармашылық батылдық пен тәжірибе жинау және одан әрі кәсіби өсуге қосымша ынталандыру мүмкіндігі. Байқау маған өмірде жасалған таңдау - мамандық таңдаудың дұрыстығына сенімділік берді, – деп есептейді Анар Ассалауова.

Өңір мәдениетін дамытуға қосқан елеулі үлесі, шығармашылық табыстары және Қазақстан мен өз өлкесінің мәдени мұрасын халық арасында белсенді насихаттағаны үшін "Шабыт" номинациясының жеңімпазы Есжан Әміров болды.

Білім берудің заманауи әдістерін дамытуға, педагогтардың жас буынына тәлімгерлік пен тәрбие беруге қосқан үлесі бағаланған "Насихат" номинациясында Дидар Төрекелді атап өтілді.

– Менің педагогикалық өтілімін 28 жыл. 19 жылға жуық Майқұдық қаласындағы № 61 мектепте қазақ тілі мен әдебиеті пәнінің мұғалімі болып жұмыс істедім. Мен өмірде жеңімпазбын және бұл қасиетті оқушыларыма сіңіремін. Биыл олар 32 рет республикалық жарыстардың жүлдегерлері мен жеңімпаздары атанды. Мен үшін ең бастысы - балалар дамып, өмірде өздерін тауып, өз Отанының патриоты болуы. Менің еңбегімді жоғары бағалағаны үшін рахмет, бұл одан да көп жұмыс істеуге түрткі болады, – дейді Дидар Төрекелді.

"Табыс" номинациясы бойынша "Қарағанды-Нан” Корпорациясы" ЖШС жеңіске жетті. Сыйлық бәсекеге қабілетті бизнесті дамытқаны, өндіріске және экономикалық процестерді басқаруға инновациялық тәсілдерді енгізгені үшін берілді.

Өңірдің әлеуметтік-экономикалық дамуына, әлеуметтік маңызы бар жобаларды іске асыруға және халық арасында азаматтық бастаманы насихаттауға қосқан үлесі үшін "Ұстаным" номинациясында Эльмира Орынбаева марапатталды.

Дәстүр бойынша байқаудың барлық лауреаттарына дипломдар табысталды, ал номинациялардың әрқайсысында жеңімпаз бас жүлде – авторлық мүсіншеге ие болды.

Іс-шараны Қарағанды қаласының ішкі саясат бөлімінің қолдауымен Қарағанды облысының кәсіпкерлер қауымдастығы ұйымдастырды.