Қарағанды облысында мини-футболдан әлем чемпионатының күміс жүлдегерлері марапатталды

Құрамы негізінен қарағандылықтардан құралған мини-футболдан ұлттық құраманың ойыншылары БАӘ-д өткен әлем чемпионатында екінші орын алды. Қарағанды облысының әкімдігінде күміс жүлдегерлер марапатталды.

Чемпионат Рас-Эль-Хаймада өтті. Біздің футболшылар соңғы уақытқа дейін Румыниядан келген қарсыластарына реванш бермей, финалдық матчтың негізгі уақытын 2:2 есебімен аяқтады. 

Ойынның басында қазақстандықтар екі доп айырмашылығымен алға шығып, көш бастады. Бірақ қарсыластар есепті теңестіре алды, бұл оларға ойынды қосымша уақытқа ауыстыруға мүмкіндік берді. Алайда экстра-таймдар жеңімпазды анықтаған жоқ. Алтынның тағдыры пенальти сериясында шешілді, онда сәттілік Румыния құрамасының жағында болды – 12:11.

Нәтижесінде Румыния құрамасы бірінші орынға шықты, біздің футболшылар күміс медаль жеңіп алды, ал үшінші орында Венгрия жасағы тұрды. Үшінші орын үшін ол Әзірбайжанды 3-1 есебімен жеңді.

– Біздің ойыншылар керемет ойнады: румындар – бірнеше дүркін чемпиондар, сондықтан финалға осындай қарсыласпен шығу – үлкен жеңіс, – деді Қарағанды облысы әкімінің орынбасары Ерлан Құсайын спортшыларды құттықтап. – Құрама құрамында көбіне қарағандылықтардың болғаны қуантады. Сіздердің жеңістеріңіз – біз үшін үлкен мақтаныш. Күміс медаль сіздердің жеңістеріңіздің бастамасы ғана болатынына сенімдіміз.

Айта кетейік, қазақстандық құрама мини-футболдан әлем біріншілігінің финалында тұңғыш рет ойнады.

– Біз бұл чемпионатқа жаздың басынан бастап дайындалдық. Сапар алдында біз Қазақстанда үш турнирге қатысып, екі финалда ойнадық. Біз Қазақстан чемпионатында жеңіске жеттік, бірақ әлемде кішкене сәттілік жетпей қалды. Ал тактика бойынша біз жақсы ойнадық, – деп атап өтті команда жаттықтырушысы Павел Таку. – Қазір біз алдымызға Еуропа чемпионатына қатысу және жеңіске жетуді мақсат етіп отырмыз. Алдымызға маңызды міндеттер қойып, алтынға ұмтыламыз.