Балқаштық жас бишілер халықаралық байқаудың Гран-приін жеңіп алды

Балқаш қаласының ЮНЕСКО балалар өнер мектебінің "Ақ маржан" халық би ансамблі 80-ші, "Pro танцы Kz" мерейтойлық халықаралық чемпионатында Гран-при мен тоғыз бірінші орынды иеленді.

Чемпионат Алматыда өтті. Оған Қазақстанның түкпір-түкпірінен, сондай-ақ жақын шетелден 60-қа жуық би ұжымы қатысты. "Ақ маржан" ансамблі қазылар алқасына 10 би нөмірін ұсынды. Олардың барлығы төрешілер мен көрермендердің жоғары бағасына ие болды.

– Біздің "Лотос" биіміз Гран-при жеңіп алды. Оны ансамбльдің 11 мүшесі орындады, олар орындау техникасымен, әртістігімен және костюмдерімен қазылар алқасының мүшелерінің көңілінен шықты. Біз бұл чемпионатқа бір айға жуық дайындалдық, салған күш-жігеріміз ақталды, – деді ансамбль жетекшілерінің бірі Айзат Тоғайбаева. – Мен қойған тағы үш би де бірінші орынға ие болды. Бұл "Гюзаль қыз", "Толғау"және "Қызғалдақ".

Айзат өзі "Үздік жетекші" номинациясына ие болды. Ол кәсіби хореограф, өнер мектебінде алты жылдан астам жұмыс істейді.

– Бұл номинация менің қыздарымның қажырлы еңбегінің нәтижесі. Оларсыз мен бұл жүлдені алмас едім. Менің әріптестерім де жақсы нәтижелерге қол жеткізді. Олардың қатарында педагогтар Айман Баймамырова, Шырайлым Мәди, Мейрамкүл Бекбенбет бар. Олардың би нөмірлері де бірінші орынға ие болды, – деп атап өтті Айзат Тоғайбаева.

"Ақ маржан" ансамблінде 300-ден астам бала айналысады. Ұжым көптеген республикалық және халықаралық байқауларда бірнеше рет жеңіске жеткен. 2020 жылы Түркияға халықаралық чемпионатқа жолдама жеңіп алды. Бірақ карантинге байланысты балалар ол жаққа бара алмады. Болашақта педагогтар тәрбиеленушілерге шетелдік сахналарда өнер көрсетуге мүмкіндік сыйлауды жоспарлап отыр.