Биылғы 9 айдың қорытындысы бойынша мемлекет 38 мыңнан астам мұқтаж отбасыға тұрғын үй көмегін көрсетті

Тұрғын үй көмегі аз қамтылған отбасыларға немесе азаматтарға коммуналдық қызметтерге (жылу, электр және сумен жабдықтау, байланыс, лифтілерді ұстау және т. б.) шығыстарды өтеу үшін тоқсан сайын төленеді. Басты шарт – алушының меншігінде ҚР аумағында бір ғана тұрғын үй болуы не мемлекеттік тұрғын үй қорынан немесе жеке тұрғын үй қорынан жергілікті атқарушы орган жалдаған тұрғын үйді жалдаушы (тең жалға алушы) болуы тиіс.

Бұған дейін ҚР Өнеркәсіп және құрылыс министрлігі хабарлағандай, биылғы жылдан бастап Қазақстанда азаматтарды мемлекеттік тұрғын үй көмегімен қамту көлемі ұлғаяды. Үкімет қаулысымен тиісті ережелерге өзгерістер енгізілді.

Өзгерістерге сәйкес, егер коммуналдық шығындардың деңгейі отбасының немесе азаматтың орташа айлық жиынтық табысының 10%-нан асса, тұрғын үй көмегі төленеді. Бұрын бұл көрсеткіш әр аймақта әртүрлі мөлшерде, яғни 2%-дан 20%-ға дейін болған. Бұл ретте әкімдіктер әлі де рұқсат етілген шекті деңгейді 10%-дан төмен төмендетуге құқылы.

Мысалы, егер отбасының немесе азаматтың орташа айлық жиынтық табысы 100 мың теңгені, ал коммуналдық қызметтерге жұмсалатын шығыстар – 15 мың теңгені (табыстың 10%-дан астамын) құраса, онда тұрғын үй көмегін алушының жергілікті бюджет қаражаты есебінен айырманы өтеуге құқығы бар.

Осылайша, қабылданған норма тұрғын үй көмегін алушыларды қамтуды кеңейтуге және аз қамтылған азаматтарға қаржылық жүктемені азайтуға мүмкіндік береді.

Әкімдіктердің деректері бойынша 2023 жылғы 3 тоқсанның қорытындысы бойынша 38,8 мың отбасына тұрғын үй көмегі көрсетілді, мұқтаж азаматтар үшін коммуналдық қызметтерге жұмсалған шығындарды өтеу үлесі республика бойынша орташа есеппен 51,6 % құрады.

ҚР ҚР Өнеркәсіп және құрылыс министрлігінің Баспасөз қызметі