Жыл басынан бері Қарағанды облысының тұрғындары медициналық сақтандыру қорына 41 млрд теңгеден астам қаражат аударды

Осы жылдың сегіз айында Қарағанды облысының тұрғындары медициналық сақтандыру қорына 41,2 млрд теңге аударды. Алайда өңірде 180 мыңнан астам адам сақтандырылмаған күйінде қалып отыр.

Түскен қаражаттың 23,5 млрд теңгесі – жұмыс берушілердің жұмыскерлер үшін аударымдары. Өткен жылдан бастап олар жалақы қорының 3%-дан аударады. Тағы 15,1 млрд теңге – жалақының 2 % аударатын қызметкерлердің жарналары. Қалғаны – ЖК, жеке құрылымдар мен МЖӘ шарттары бойынша жұмыс істейтін адамдардың, дербес төлеушілер мен БЖТ төлеушілердің жарналары. Республика шеңберінде біздің өңірдің түсімдерінің үлесі 7,8 % құрайды.

1 қыркүйектегі жағдай бойынша облыста сақтандырылған азаматтардың саны 955 383 адамды, сақтандырылмаған азаматтардың саны 180 652 адамды құрады.

– Сақтандырылмағандардың арасында қандай да бір себептермен медициналық сақтандыру қорына жарна төлей алмай жүрген азаматтар бар, тиісінше олардың медициналық көмекке құқығы тегін медициналық көмектің кепілдік берілген көлемінің тізбесімен шектеледі, – дейді медициналық сақтандыру қорының Қарағанды филиалының директоры Фазыл Көпобаев. – МӘМС жүйесіне қатысудың ықтимал тетіктері әртүрлі деңгейлерде талқыланады. Халықтың осы санаты арасында түсіндіру жұмыстарын күшейту қажет.

Медициналық сақтандыру қоры Қарағанды филиалының баспасөз қызметінің ақпараты бойынша