Қарағанды облысында әскери полиция қызметкерлері баланы құтқарғаны үшін марапатталды

Қарағанды өңірлік гарнизоны әскери полиция басқармасының үш әскери қызметшісі өрт кезінде баланы құтқарғаны үшін марапатталды. Ерлігі үшін медаль мен алғыс хаттарды ҚР Төтенше жағдайлар министрі генерал-майор Сырым Шәріпханов табыстады.

Марапатталғандардың арасында "Өртте көрсеткен қайсарлығы үшін" медалін алған сержант Жандос Айтқали мен алғыс хаттармен марапатталған ефрейторлар Ізбасар Төлеутай мен Шыңғыс Ерқанат бар.

Восток-2 шағынауданындағы көппәтерлі тұрғын үйдің пәтерлерінің бірінде өрт 25 тамызда болған. Әскери қызметшілер өтіп бара жатып, бірінші қабаттағы пәтердің терезелерінен қалың түтінді байқады. Куәгерлердің бірі жанып жатқан бөлмеде бала болуы мүмкін деп хабарлады.

Сержант Жандос Айтқали бірден терезеден пәтерге кіріп кетті. Түпкі бөлмеде ол баланы тауып, оны сыртта тұрған әріптестеріне берді. Көп ұзамай өрт сөндірушілер келіп, өртті сөндіруге кірісті.

Оқиғадан кейін әскери қызметшілер өз жұмыстарына оралды. Олардың әрекеттері туралы куәгерлер әлеуметтік желілерде жазды. 

ҚР Қорғаныс Министрлігі Қарағанды гарнизонының баспасөз қызметінің ақпараты бойынша