Қарағанды облысының кәсіпкерлері жарнаманы мемлекеттік тілге аударуда тегін көмек ала алады

Қарағанды облысының кәсіпкерлерінде жарнаманы мемлекеттік тілге аудару кезінде тегін көмек алу мүмкіндігі бар. Бұл туралы ӨКҚ алаңында өткен брифингте тілдерді дамыту басқармасының басшысы Салтанат Әбеуова айтып берді.

– Тіл саясаты саласындағы өзекті мәселелердің бірі қызмет көрсету және кәсіпкерлік салаларында мемлекеттік тілді ілгерілету болып табылады. Заңнама талаптарын түсіндіру және бизнеске тегін аударма және әдістемелік көмек көрсету үшін биыл 2000-нан астам нысан қамтылып, тіл заңнамасы мен байланыс ақпараты бар 2300-ден астам ақпараттық буклеттер таратылды. Сондай-ақ, кәсіпкерлерге тегін аударма және әдістемелік көмек көрсету үшін жедел желі жұмысы ұйымдастырылды, жыл басынан бері 2000-нан астам тегін аударма қызметі көрсетілді, – дейді Салтанат Әбеуова.

Көрнекі ақпарат пен жарнаманы жүйелеу мақсатында биыл тоқсан сайынғы тексерулер ұйымдастырылды. Облыс бойынша 2200-ден астам бизнес-объектілер қамтылды, оларда 1249 бұзушылық анықталды, оның 67%-ы түзетілді.

Сондай-ақ, жыл басынан бері өңірлік кәсіпкерлер палатасымен бірлесіп тілге байланысты заңнаманың талаптарын түсіндіру және әдістемелік көмек көрсету үшін 1300-ден астам кәсіпкердің қатысуымен 120 іс-шара, семинарлар, кездесулер, жиындар, дөңгелек үстелдер ұйымдастырылды.

Жедел желі телефондары: (8-7212) 51-01-88 және 8-775-163-00-00. Бұл нөмірлер бойынша кәсіпкерлер, сондай-ақ тұрғындар қатесі бар аудармаларға шағымдана алады.