Жасанды интеллект Қарағанды кардиологтарына көмекке келмек

Биометриялық сканерлеу арқылы денсаулық көрсеткіштерін қашықтықтан анықтау, арнайы ақпараттың кең көлемін талдау – мұндай мүмкіндік Қарағанды кардиологтарында пайда болады. № 2 көпсалалы аурухана базасында жүрек-қан тамырлары ауруларын үйлестіру және диагностикалау орталығы жұмыс істей бастады.

Ескі емхананың ғимараты жөндеуден кейін түрленіп шыға келді: дәрігерлердің қызметіндегі ыңғайлы кабинеттер, заманауи жабдықтар мен жаңа технологиялар пайда болды.

Қарағанды облысының әкімі Ермағанбет Бөлекпаевқа № 2 көпсалалы аурухананың директоры Арыстан Мағзұмов пен денсаулық сақтау басқармасының басшысы Бибігүл Төлегенова жаңа орталыққа экскурсия өткізді.

- Орталықтың негізгі мақсаты – жалпы практика дәрігерінің жолдамасынсыз жүрек және қан тамырлары аурулары бар науқастарды диспансерлеу. Бұл орташа және ауыр созылмалы коронарлық артерия ауруы, созылмалы жүрек жеткіліксіздігі, жүрек қағысының қарапайым және күрделі бұзылыстары бар науқастар, туа біткен және жүре пайда болған жүрек ақаулары. Бізде балалар мен ересектер кардиологтары, кардиохирургтар, қан тамырлары хирургтары кеңес береді. Функционалдық диагностиканың барлық түрлері бар – жүрек пен қан тамырларының ультрадыбыстық зерттеуі, ЭКГ және қан қысымының холтер мониторингі, - дейді Арыстан Мағзұмов.

Пациенттердің қоңырауларын арнайы дайындалған call-орталық қызметкерлері қабылдайды.

Дәрігерлерге тәжірибе мен білім алмасуға арналған Оқу орталығы ашылды.

Қыркүйек айында телемедицина кабинеті ашылады деп жоспарланып отыр. Пациенттерге нақты уақыт режимінде Қарағанды мен Астананың, Ұлттық ғылыми кардиохирургиялық орталықтың жетекші мамандары кеңес береді. Бұл әсіресе жақын жерде әрдайым бейінді мамандар бола бермейтін ауылдық жерлердің тұрғындарына қатысты.

Аймақ басшысы аурудың салдарымен күресіп қана қоймай, алдын алуға баса назар аударуды сұрады.

- Біз денсаулық сақтау саласына ауқымды бюджеттік ақша жұмсаймыз. Екі жыл ішінде ауылдық жерлерде 92 ФАП салынады. Оның 14-і қазірдің өзінде салынуда. Біз дәрігерлерді шетелге оқуға жібереміз, жас мамандарға арналған көтерме көлемін ұлғайттық, заманауи жабдықтарды сатып аламыз. Бірақ кадрлар ең үлкен мәнге ие. Бұл мәселемен де айналысамыз, - деп атап өтті Ермағанбет Бөлекпаев.