Қарқаралы ауданы Ақжол ауылының барлық түлектері білім гранттарына ие болды

Ақжол ауылындағы Әлібек Бүркітбаев атындағы № 12 жалпы білім беретін мектептің түлектері білім гранттарын алды. Мұғалімдер өз оқушыларының жетістігін құр сәттілік емес, жүйелі дайындықтың нәтижесі деп санайды.

Ақжол ауылы Қарқаралыдан 35 шақырым жерде орналасқан. Биыл Әлібек Бүркітбаев атындағы мектепті бес адам ғана бітірді. Олардың барлығы ҰБТ-да жақсы ұпай жинап, білім беру гранттарына ие болды.

17 жасар Аяулым Бекасыл мен Дария Қуатова Е. А. Бөкетов атындағы Қарағанды университетіне "математика-статистика" және "коммуникациялар және коммуникациялық технологиялар" мамандықтары бойынша оқуға түсті. Қыздар ҰБТ олар үшін нағыз сынақ болғанын мойындайды, олар тестілеу кезінде қатты уайымдады.

– Біз толқуымызды басып, жақсы ұпай жинап, гранттар алдық, – дейді Аяулым Бекасыл. – Мен және Дария мектепті "Алтын белгіге" бітірдік. Мұның бәрі біздің педагогтардың еңбегі. Олар 10-сыныптан бастап бізді тестілеуге қатты дайындады.

– Мұғалімдер барлық бос уақыттарын бізге арнады. Біз оларға өте ризамыз, – дейді Дария.

Әлібек Бүркітбаев атындағы мектеп шағын жинақты болып саналады. Өткен оқу жылында барлығы 110 бала оқыды. Сондай-ақ мектепте 30 балаға арналған шағын орталық бар.

– Биылғы жылы бірінші сыныпқа небәрі 9 бала қабылдадық. Бұл көптеген ауылдардың проблемасы шығар. Жалпы, біздің мектеп жақсы, мұғалімдер де білікті. Біз түлектерімізді мақтан тұтамыз және олардың ата-аналарына қолдау көрсеткені үшін алғыс айтамыз. Биылғы жылы мектепті екі қыз және үш ұл бітірді. Олардың әрқайсысы өмірде өз орнын табады деп сенемін, – деді мектеп директоры Әсел Омарова.