Нағыз спорт мерекесі: Қарағандыда "Арай-2023" жазғы спартакиадасы басталды

Қарағанды орталық саябағында "Арай-2023" өңір қалалары арасында ХVІ облыстық жазғы спартакиаданың ашылуы өтті.

Ұйымдастырушылар Қазақстанда тамыздың әр үшінші жексенбісінде атап өтілетін Спорт күні қарсаңында спортшылар мен қала тұрғындары үшін үлкен ойын-сауық бағдарламасын дайындады.

Спартакиадаға Қарағанды, Теміртау, Балқаш, Приозерск, Саран және Шахтинск қалаларынан 600-ге жуық спортшы қатысады.

– Спортшылар екі күн бойы 12 түрде жарысады: армрестлинг, волейбол, қазақ күресі, жеңіл атлетика, үстел теннисі, шағын футбол, жазғы президенттік көпсайыс, пауэрлифтинг, тоғызқұмалақ, шахмат, дойбы, асық ату және бес асық. Мен спартакиаданың төрешісі ретінде алтыншы рет қатысып отырмын. Біздің басты мақсатымыз – адал төрешілік, ал спортшыларға сәттілік! – деп жарыстың бас төрешісі Қайрат Абдуллаев тілегін білдірді.

Шахтинск қаласынан келген "Тентек" ДСК нұсқаушысы Дарья Федько спартакиадаға үшінші рет қатысып отыр. Мұндай жарыстар спортқа үлкен ынта береді дейді.

– Біздің команда ерлер мен әйелдер арасында барлық жас санаттарына қатысады. Біздің қатарымызда бухгалтерлер, мұғалімдер, ІТ мамандар, жеке кәсіпкерлер бар. Біз көп жаттықтық. Жүлдегерлер үштігіне енеміз деп сенемін, – деді Дарья.

Қарағанды облысы әкімінің орынбасары Ербол Әліқұлов спортшыларға жеңіске жетуге тілек білдірді.

– Шын жүректен жеңістер тілеймін! Ең бастысы, спартакиада халықтың барлық топтарын біріктіреді. Студенттер де, мемлекеттік қызметкерлер де, зейнеткерлер де, мүмкіндігі шектеулі жандар да қатысады. Басты міндет – бүкіл халқымызды спортқа тарту.

Мереке барысында ерекше көзге түскен жаттықтырушылар мен оқытушыларға дене шынықтыру мен спортты дамытуға қосқан елеулі үлесі үшін алғыс хаттар, құрмет грамоталары мен сыйлықтар табыс етілді.

Әлия Молдағұлова атындағы олимпиадалық резерв колледжінің мамандандырылған мектеп-интернатының жұмысшысы Абылай Шүланбаев "Құрметті спорт қызметкері" төсбелгісіне ие болды.

Көрермендер нұсқаушылармен зумба жаттығуына қатыса алды.

Іс-шараның қонақтары қазақстандық балуан Сергей Цырульников пен қарағандылық Mosaic Live Band тобы болды.

Мереке DJ Pyshka және DJ Style тректеріне арналған дискотекамен аяқталды.