Нұра ауданының бизнесін жаңа бастаған кәсіпкерлері жеңілдетілген шағын несиелер алды

Нұра ауданында бизнесін жаңа бастаған алты кәсіпкер жеңілдікті шарттармен шағын несиелер алды. Олар мал шаруашылығын дамытуды және құм блоктарын өндіруді жолға қоймақшы.

21 жастан 35 жасқа дейінгі жастарға шағын несие беру бағдарламасын Нұра ауданында алғашқылардың бірі болып 25 жастағы Айтолқын Құсайынова пайдаланды.

Ол жылдық 2,5%-бен 5 миллион теңге алды және Баршино ауылында құм блоктарын шығару өндірісін ашуға ниетті.

Бойжеткен өндіріске арналған базаны да тауып қойған екен.

– Қазір біздің ауылда және оның маңында кәсіпкерлердің белсенді дамуын байқап отырмыз. Құм блоктары өте сұранысқа ие, көбісі оларды Астанадан алып келеді, бұл оның құнына әсер етеді. Осы тауашаны зерттегеннен кейін мен осындай блоктардың өндірісін жолға қоюды шештім, – дейді Айтолқын Құсайынова. – Екі адамды жұмысқа орналастыруды жоспарлап отырмын. Мен қазірдің өзінде жабдыққа тапсырыс бердім. Бетон араластырғыш және құм блоктарына арналған машина алдым. Тауарға сұраныс болатынына сенімдімін.

Нұра кентінің тұрғыны Қымбат Шерубаева 3,3 миллион теңге көлемінде несие алды. Осы қаражатқа ол жылқы өсіруді жоспарлап отыр.

– Бізде ұсақ мал мен сиыр бар. Енді жылқы өсірумен айналысқымыз келеді, қымыз өндірісін жолға қойғымыз келеді, – дейді кәсіпкер. – Бірінші жылы бізде несиелік демалыс бар. Содан кейін несиені төлей бастаймыз. Бұл жастар үшін өз бизнесін бастауға тамаша мүмкіндік.

Нұра ауданында биыл ісін жаңа бастаған тоғыз кәсіпкерді қолдау жоспарлануда. Бөлінген қаражаттың жалпы сомасы – 45 миллион теңге.