Қарағандыда балалар үйінің тәрбиеленушілері үшін футбол мерекесі ұйымдастырылды

Қарағандыдағы балалар үйінің тәрбиеленушілері үшін футбол фестивалі өтті.

200-ден астам бала шеберлік сабақтарына, байқауларға қатысып, "Шахтер" командасының кәсіпқойларымен матч өткізе алды.

Футбол фестивалі УЕФА-ның "Футбол және әлеуметтік жауапкершілік" бағдарламасын жүзеге асыру аясында "Шахтер" стадионының негізгі алаңында өтті.

"Шахтер" футбол орталығының жаттықтырушылары жас қонақтар үшін спорттық сайыстар өткізіп, "Шахтер" ФК командаларының ойыншыларымен футбол матчын ұйымдастырды. Сондай-ақ, футболшылар балаларға шеберлік сабақтарын өткізді.

– Достық матч пен ойын-сауық бағдарламасынан кейін балаларды сыйлықтармен қуантты. Сондай-ақ олар үшін мерекелік түскі ас ұйымдастырылды, – дейді "Шахтер" ФК балалар-жасөспірімдер футболын дамыту жөніндегі директоры Наталья Сухорукова. – Іс-шараның мақсаты – балаларды салауатты өмір салтына баулу, сондай-ақ кәсіби футбол атмосферасына баулу.

Осы секілді фестивальдер еліміздің сегіз қаласында – Қостанай, Павлодар, Тараз, Алматы, Петропавл, Шымкент, Қызылорда және Өскеменде өтті.

Қарағанды облысы дене шынықтыру және спорт басқармасының баспасөз қызметінің ақпараты бойынша