Қарағанды облысында алғаш рет оныншы сынып оқушыларына арналған Daraboz зияткерлік ойыны ұйымдастырылды

Қарағанды облысында алғаш рет оныншы сынып оқушылары арасында Daraboz зияткерлік байқауы өтті. Бірінші орынды Н. Нұрмақов атындағы ММЛИ оқушысы Жәния Жұмағали иеленді.

Облыстық кезеңге аудандық және қалалық турлардың Гран-приін алған 24 оқушы қатысты.

– Ойынның мақсаты – балалар өздерінің жан-жақты білімдерін көрсетуі. Сұрақтар бірнеше саланы қамтиды: әдебиет, тарих, медицина, спорт, ғылым, мәдениет және т. б. Сондай-ақ сұрақтардың барлығы біздің елге қатысты болды.

Байқау сонымен қатар көшбасшылық қасиеттерді дамытуға ықпал етеді. Бұл "Дарын" ойынының нұсқасы. Енді біз оны жыл сайын өткізгіміз келеді, – дейді "Сарыарқа дарыны" балаларға арналған қосымша білім беру өңірлік ғылыми-практикалық орталығының басшысы Нүркен Ашықпаев.

– Байқау өте қызықты, ойын түрінде ұйымдастырылған. Қалалық турда мен Гран-при алдым және облыстық кезеңге өттім. Байқау ұнады: білімімді тексеруге мүмкіндік болды. Физика және математика, қазақ тілі мен әдебиеті пәндерінен олимпиадаларға жиі қатысамын. Болашақта математика пәнінің мұғалімі болғым келеді, – деп бөлісті Балқаш қаласының № 9 ЖББМ 10-сынып оқушысы Жұлдыз Бөде.

Байқау қорытындысы бойынша бірінші орынды Н. Нұрмақов (Қарағанды) атындағы ММЛИ оқушысы Жәния Жұмағали иеленді. Балқаш қаласының Абай атындағы № 2 мектеп-лицейінен Мадина Асанова екінші орын алды. Үшінші орын Шет ауданы Ж. Ақылбаев атындағы мектеп-гимназиясының оқушысы Ажар Боранбайға бұйырды.

Жеңімпаздарға дипломдар мен сыйлықтар табысталды.