Димаш Құдайбергеннің француз жанкүйерлері қарағандылық 50 ерекше балаға мереке ұйымдастырды
Көңілді ойын-сауық және дәмді тағамдар – Қарағандыдағы Вala рark орталығында "Батыл жүрек" Қорының 50 шәкірті үшін қайырымдылық мерекесі өтті. Оған Франциядан келген Димаш Құдайбергеннің жанкүйерлері қаражат жинады.
Өз кумирінің туған күнінде фан-клуб қатысушылары Қазақстанның түрлі өңірлерінде қайырымдылық акцияларын ұйымдастырады.
Қарағанды әкімінің мүгедектердің құқықтарын сақтау мәселелері жөніндегі кеңесшісі Әсел Бекбаеваның айтуынша, биыл жанкүйерлер қарағандылық балаларды қуантуға шешім қабылдаған.
– Бүгін біз акцияны "Батыл жүрек" қорындағы 50 балаға өткіземіз. Үйде оқитын балалар, сондай-ақ мектеп-интернаттарға баратындар қатысады. Bala рark ойын-сауық орталығында біз бесінші рет қайырымдылық шарасын өткіземіз. Жақында демеушінің арқасында біз мұнда даму мүмкіндігі шектеулі балаларға арналған мектеп-интернаттың 110 тәрбиеленушісіне арналған мереке ұйымдастырдық. Ұжымның біздің балаларымызға ерекше көзқарасы үшін ойын-сауық орталығына ерекше алғыс айтамыз. Адамдарды осындай игі істерге шабыттандыратын шығармашылығы үшін Димашқа рахмет! – деді Әсел Бекбаева.
"Батыл жүрек" қорының кураторы Александра Самул болды.
– Мен аутизм спектрі бұзылған ұлымды тәрбиелеп жатырмын. Бүгінгі іс-шара – менің баламның қуанышы. Егер менің ұлым бақытты болса, мен де бақыттымын. Бізге жағымды эмоциялар өте қажет, – дейді Александра Самул.
Арай Мұхатаева ұлымен бірге іс-шараға арнайы шағын транспарант жасапты. Димаш Құдайбергеннің шығармашылығын олар біледі және жақсы көреді.
– Біз Димаштың жанкүйерлері ерекше балаларға құрметпен және қамқорлықпен қарайтынына қуаныштымыз. Мұндай акциялар өте қажет. Ұлым тек үй мен мектепті көреді, эмоциялар, жаңа әсерлер жоқ. Ал мұндай мерекелерде ол құрдастарымен араласады, қуанады, көңіл көтереді, – деді Арай Мұхатаева.
Мереке сабын көпіршіктерімен және аниматорлармен бірлескен ойындармен аяқталды.
Әсел Бекбаева қарағандылықтарды акцияны қолдауға шақырады.
– Егер жанашыр жерлестеріміз мүгедектігі бар балаға кем дегенде бір күн ұмытылмас әсер қалдырғысы келсе, онда біз жобаны жалғастырамыз және мүмкіндігінше ерекше балаларды қамтимыз. Бұл мереке олардың ата-аналарына да қажет. Мұнда олар ашылып, балалары үшін қуанады, – деп есептейді Қарағанды әкімінің кеңесшісі.
Ерекше балалардың бос уақытын ұйымдастыру бойынша өз ұсыныстарыңызды +7-702-745-43-02 (Әсел Бекбаева) телефоны бойынша қалдыруға болады.