Гүл тілі: Қарағандыдан келген студент WorldSkills Kazakhstan чемпионатында бірінші болды

Қарағанды техника-құрылыс колледжінің студенті Анастасия Смирнова WorldSkills Kazakhstan кәсіби шеберлік чемпионатында гүлді сайыста жеңіске жетіп, EuroSkills Gdansk 2023 іріктеу турына қатысуға жолдама алды.

Бойжеткен "Азаматтық ғимараттарды қайта құру және қалпына келтіру дизайны" мамандығы бойынша үшінші курста оқиды. Бірақ оның жүрегіне флористика жақынырақ. Ол гүлдердің түпнұсқа, үйлесімді және сауатты құрылған композицияларын жақсы көреді және жасай алады.

Елордалық сервис және туризм колледжінің базасында өткен WorldSkills Kazakhstan чемпионатына қарағандылық студент алғаш рет қатысты. Ол төрт модульді сәтті орындады.

– Мен 18 жастамын. Сайыста дизайнды таңдадым, өйткені мен бала кезімнен сурет салғанды ұнатамын. Бірінші модульде біз көктемгі букетті спиральды техникамен құрастырып, түс схемасын өзіміз таңдауымыз керек еді, – дейді Анастасия. – Екіншісінде Алматыдағы Rixos қонақ үйінің лобби-аймағына арналған композиция жасалды. Үшіншісінде қалыңдықтың букетін алмастыратын декорация ұсынылды. Кез-келген техниканы таңдауға болды, бірақ мен монтажды қолдандым. Ол ең қиын техникалардың бірі. Соңында өсімдіктер мен гүлдерден құралған флорариум композициясын көрсеттік. Жалпы, мен керемет тәжірибе мен үлкен сабақ алдым. Қарсыластарым лайықты болды.

Чемпионатқа еліміздің алты өңірінен келген студенттер қатысты. Анастасия Көкшетаудағы қарсыласынан аз ғана айырмашылықпен жеңіске жетті. Екі қыз да EuroSkills Gdansk 2023 іріктеу турына жолдама алды.

– Қыздар ұпай бойынша өте жақын болды. EuroSkills Gdansk 2023 іріктеу турына дейін олар 67 күндік жаттығу лагерінен өтеді. Соның ішінде біздің колледж базасында бір ай оқитын болады. Содан кейін олардың арасында іріктеу туры өтеді, жеңімпаз Польшада өтетін Халықаралық байқауда Қазақстанды таныстырады, – деді Анастасияның жетекшісі Людмила Кудашова.

Қарағанды техника-құрылыс колледжінің дизайн және сәндік-қолданбалы өнер бөлімінде 370 адам оқиды. Бұл негізінен болашақ интерьер дизайнерлері мен ландшафт дизайнерлері. Сондай-ақ студенттер "Азаматтық ғимараттарды қайта құру және қалпына келтіру дизайны" және "Өнеркәсіптік дизайн" мамандықтарын таңдайды.