Нұра ауданының Ізенді ауылы жедел жәрдем көлігін алды

Ізенді ауылының ФАП-не жедел жәрдем көлігі берілді. Ол барлық қажетті жабдықтармен жабдықталған және 600-ден астам жергілікті халыққа қызмет көрсететін болады.

Ізенді ауылы Нұра кентінен 90 шақырым және облыс орталығынан 220 шақырым жерде орналасқан. Жергілікті ФАП-те өзінің жедел жәрдем көлігі ешқашан болған емес. Адамдар Нұрадан жедел жәрдемді ұзақ күтуге немесе көлік үшін жергілікті ЖШС басшысына жүгінуге мәжбүр болған.

– Мен мұнда 2002 жылы көшіп келдім. Осы уақыт ішінде бізде жедел жәрдем болған жоқ. Бір кезде мен аудан орталығынан жедел жәрдемді 2,5 сағат күткенім есімде. Бақытымызға орай, бәрі ойдағыдай өтті, – дейді ауыл тұрғыны Бейбіт Шогенбаев. – Енді бізде өз көлігіміз бар, барлық ауыл тұрғындары қуанып жатыр.

Сондай-ақ, осы жылы Ізендіде жаңа фельдшерлік-акушерлік пункт салу жоспарлануда. Қазір ескі ФАП-те бес медицина қызметкері жұмыс істейді.