Қарағанды облысында Наурыз қалай атап өтіледі

Қарағанды облысында Наурыз мейрамына орай ауқымды бағдарлама дайындалды. Мерекелік іс-шаралар 14 наурызда басталып, 23-не дейін жалғасады. Концерттер мен мерекелік кештер ғана емес, экологиялық және қайырымдылық акциялар да болады.

Бұл туралы аппараттық кеңесте мәдениет, архивтер және құжаттама басқармасының басшысы Еркебұлан Жұмакенов айтып берді.

Наурыз мерекесінің басты идеясы – Қазақстан жерінде бейбітшілік пен достықты нығайту, ұлттық бірегейлікті сақтау, отбасылық құндылықтарды дәріптеу, қоршаған ортаға ұқыпты қарауды қалыптастыру.

Күн сайын жеке тақырыпқа арналған:

14 наурыз – Көрісу күні;

15 наурыз – Аула күні;

16 наурыз – Шежіре күні;

17 наурыз – Тарихқа тағзым күні;

18 наурыз – Игі істер күні;

19 наурыз – Шымырлық пен шеберлік күні;

20 наурыз – Зияткерлік күн;

21 наурыз – Ұлттық тағамдар күні;

22 наурыз – Ұлыстың ұлы күні;

23 наурыз – Жоралғы күні.

– Облыстың қалалары мен аудандарында негізгі мерекелік шаралар 21-22 наурызда этноауылдар орнатумен, театрландырылған қойылымдармен, концерттермен, спорттық жарыстармен өтеді. Облыс бойынша 302 киіз үй орнатылады, – деді Еркебұлан Жұмакенов.

Қарағандыда басты мереке 22 наурызда өтеді. Қала бойынша 31 киіз үй орнатылады: Орталық мәдениет және демалыс саябағында, Достық үйінің, Жаңа Майқұдық мәдениет үйінің, Теміржолшылар мен "Молодежный" мәдениет үйлерінің жанында. Орталық саябақтың жағалауында сағат 12:00-де театрландырылған қойылым басталып, концертпен жалғасады. Ұлттық спорт түрлерін сүйетіндер үшін жарыстар ұйымдастырылады. Жергілікті қолөнершілер өз өнімдерін көрмеге ұсынады.

Сол күні Кеншілер мәдениет сарайында Бұқар жырау Қалқаманұлының 355 жылдығына арналған "Армыстың әз Наурыз" атты республикалық айтыс өтеді.

Он күн ішінде қалалар мен аудандарда бірқатар іс-шаралар өтеді. Шет ауданында "Біздің көше тұрғындары" тату көршілік байқауы өтеді. Абай ауданында концертте этномәдени бірлестіктер өз жұмыстарын ұсынады. Саран қаласында "Алтын мұра" хореографиялық өнер фестивалі, Приозерск қаласында құрақ құрау бойынша байқау, Қарқаралы қаласында жерлес сатирик М. Тоқмырзаның 55 жылдығына арналған әзіл-сықақ байқауы өтеді.

Кітапханаларда еңбек әулеттерінің өкілдерімен кездесулер ұйымдастырылады.

Барлық қалалар мен аудандарда қайырымдылық акциялары өтеді.