Қарағандының қосымша білім беру орталығында коворкинг-орталық пайда болды

Қарағандының № 5 қосымша білім беру мектеп-орталығында коворкинг-орталық іске қосылды. Мұғалімдер оқыту мен шығармашылыққа арналған заманауи алаң оқушыларға сүйікті ісімен айналысуға, шығармашылық жобалар жасауға және құрдастарымен қарым-қатынас орнатуға мүмкіндік беретініне сенімді.

 – Коворкинг орталығы үш аймаққа бөлінген: біріншісі ұлттық құндылықтарды дәріптеуге бағытталған, екіншісі ерекше білім беру қажеттіліктері бар балаларға арналған, үшіншісі "кітап оқитын мектеп" жобасы аясында құрылған, – деді оқу орнының директоры Торғын Нұрмағамбетова.

Барлық үш аймақта балалар бос уақыттарын өткізе алады, ата-аналарымен бірге кітап оқып, сабақтан тыс іс-шаралар ұйымдастыра алады.

Коворкинг орталығының бір аймағы этностильде безендірілген.

Мұнда балалар қазақ халқының түрлі салт-дәстүрлерімен танысып, "Әжелер" клубының қатысушыларымен, ата-аналарымен іс-шаралар өткізе алады.

Орталықтың оқу аймағында көптеген көркем әдебиет бар. Оқушылар ұялы телефондары арқылы арнайы QR кодын сканерлеп, танымал авторлардың шығармаларын оқи алады. Сонымен қатар, орталық компьютерлермен жабдықталған және интернет желісі қосылған.

Балаларға арналған инклюзивті аймақта қосымша сабақтар үшін барлық жағдайлар жасалған.

– Бізде 51-сыныпта 1070 бала оқиды. Оның ішінде ерекше білім беру қажеттіліктері бар 30-дан астам бала бар. 13 оқушы "Әр бала мектепке лайық" жобасы бойынша жеке бағдарламалармен айналысады. Мектептегі коворкинг – шабыт, оқу, білім алу, қарым-қатынас құру және демалу бұрышы. Сондай-ақ бізде 12 тегін үйірме жұмыс істейді. Жоғары сынып оқушылары көлік жүргізуді үйрене алады, кіші сынып оқушылары өнер студиясында оқиды, сурет салады, мүсіндейді. Орта буын оқушылары "Жас шебер", робототехника, шахмат үйірмелеріне қатысады. Біздің үйірмелерге жақын маңдағы оқу ұйымдарының балалары да келеді, – деп атап өтті мектеп директоры.