Қарағандыда мүгедектігі бар адамдарға тегін заң көмегі көрсетіледі

Ten Qogam әлеуметтік бейімдеу орталығында ерекше қажеттіліктері бар Қарағанды тұрғындарына тегін заңгерлік көмек көрсетіледі. Кез-келген мәселе бойынша кеңес алуға болады.

Кәсіби көмекті заңгер Лаура Ахметова көрсетеді. Жұмыс өтілі – 8 жыл. Мемлекеттік мекемелер мен жеке ұйымдарда жұмыс тәжірибесі бар.

– Мүгедектігі бар адамдар бізге кез келген заң мәселесі бойынша жүгіне алады, – дейді орталық басшысы Аслан Қабегенов. – Біздің заңгер шағым жасауға немесе мемлекеттік органға сұрау жіберуге көмектеседі. Біз сондай-ақ облыстық адвокаттар алқасымен тығыз жұмыс істейміз. Қылмыстық істер бойынша да жүгінген жағдайлар болған. Оларға көмектесе алдық.

Консультациялар аптасына үш күн: сейсенбі, сәрсенбі және бейсенбі күндері онлайн және офлайн форматта өткізіледі.

Қабылдау уақыты: 09:00-ден 18:00-ге дейін.

Байланыс телефондары: (8-7212) 36-14-74, +7-777-540-44-94.