Қарағандының үш тұрғыны өрт кезінде адамдарды құтқарғаны үшін марапатталды

Қарағандының № 12 мектебінде батырларға құрмет көрсетілді. Оқу ордасының оқушылары, ағайынды Ерасыл мен Қанат Смағұлов өрт кезінде батылдық пен табандылық танытты.

Балалар Сұрыптауда, Жеңіс көшесінде тұрады. Оқиға бір апта бұрын, 23 қаңтарда болған. Бұл күні Ерасыл мен Қанат қарт көршілеріне ауладағы қарды тазалауға көмектесіп жатқан. Олар үйдің жанындағы қазандықтан түтін шығып жатқанын байқаған. Ұлдар бірден көмекке асыққан. Үйде үй иелері, ақсақал мен әжей болған. Жасөспірімдер зейнеткерлерді таза ауаға шығарып, киім-кешек пен құжаттарды шығарып үлгерген. Күзетші болып жұмыс істейтін көршісі Руслан Түсіповті көмекке шақырған. Өрт сөндірушілер шақырылып, олар келгенге дейін қолда бар құралдармен өртті сөндірді.

ТЖ министрінің бұйрығымен үш қарағандылық "Өртте көрсеткен қайсарлығы үшін" медалімен марапатталды. Ерасыл мен Қанат Смағұлов, Руслан Түсіповке мектеп жиынында марапаттар табысталды.

– Балалар нағыз батылдық танытып, қайғылы жағдайдың алдын алды. Ондай жағдайда кез келген адам осылай батылдық таныта алмайды, бұл ерлік пен өжеттілікті қажет етеді. Ең бастысы – дұрыс әрекет етіп, өрт сөндірушілерді шақырып, қарттарды эвакуациялауға көмектесті, – деді Қарағанды облысы ТЖД бастығының орынбасары Нұрлан Бекбосынов.

Ерасыл – 15 жаста, Қанат – 14. Балаларына жақсы тәрбиесі үшін ата-аналарына да алғыс айтылды.

Оқушыларға білім министрінің алғыс хаттары мен естелік сыйлықтар табысталды.

Қарағанды облысы ТЖД баспасөз қызметінің ақпараты бойынша