Қазақстанда Enbek мобильді қосымшасы іске қосылды

Енді қазақстандықтан электрондық еңбек биржасындағы қызметтерді смартфонға арналған қосымша арқылы ала алады. Enbek.kz мобильді нұсқасы сайтпен толығымен синхрондалған.

«Enbek» мобильді қосымшасында пайдаланушылар өздерін қызықтырған бос жұмыс орындарын қарап және жұмыс берушілерден шақырулар ала алады. Push хабарландыруларының ыңғайлы мүмкіндігі түйіндеме мен жауаптарды, сұхбатқа шақыруларды және жұмыс берушінің әңгімелесу нәтижелері бойынша шешімдерін қарау туралы ақпаратты өткізіп алмауына көмектеседі.

– Қосымша пайдаланушыға түйіндеменің қаншалықты толық толтырылғанын, жұмыс берушінің оған назар аударуы үшін тағы не қосуға болатынын айтады. Ал ізденушіні қызықтыратын сала бойынша жаңа бос жұмыс орындарын жіберіп алмау үшін іздеу параметрлерін сақтап, қолайлы бос жұмыс орындары туралы хабарлама алуға болады, – деді «ЕРДО» АҚ Жұмыспен қамту саласындағы цифрлық қызметтер департаментінің директоры Николай Брюханов.

Сонымен қатар қосымшада жұмыссыз ретінде тіркелу және жұмысынан айырылуына байланысты әлеуметтік төлем алу мүмкіндігі бар. Ол үшін электрондық цифрлық қолтаңбаның болуы қажет емес, тек мобильді азаматтар базасында тіркелу жеткілікті.

Электронды еңбек биржасында әрдайым мемлекет субсидиялайтын уақытша жұмыс орындарының кең таңдауы бар. Олардың қатарында қоғамдық жұмыстар, әлеуметтік жұмыс орындары, жастар практикасы, «Алғашқы жұмыс орны», «Ұрпақтар келісімшарты» және «Күміс жас» жобалары бойынша бос орындар қарастырылған.

Қосымша барлық пайдаланушылар үшін тегін және PlayMarket және AppStore дүкендерінде қолжетімді. Келешекте қосымшаның функционалдығы кеңейіп, жаңа сервистер мен қызметтер қосылады.

Қазақстан Республикасы Еңбек және халықты әлеуметтік қорғау министрлігі