Қарағандылық оқушы халықаралық пәндік олимпиадада екінші орын алды

Қарағандылық оқушы физика, биология және химия пәндерінен Халықаралық жасөспірімдер олимпиадасында күміс медаль жеңіп алды. Қазақстандық жасөспірімдердің қоржынында барлығы алты марапат – бір күміс және бес қола.

Физика, биология және химия бойынша халықаралық жасөспірімдер олимпиадасы (IJSO) – 16 жасқа дейінгі оқушыларға арналған жыл сайынғы жеке және командалық жаратылыстану жарысы. Биылғы жылы жарыс 2–12 желтоқсан аралығында Богота қаласында (Колумбия) 60-тан астам елдің қатысуымен өтті. Олардың әрқайсысы алты оқушыдан тұратын команда шығарды.

Қатысушылар тапсырмаларды үш кезеңде орындады: тест, теориялық және эксперименттік. Әрқайсысында үш пән бойынша тапсырмалар ұсынылды.

– Қазақстандық жасөспірімдер халықаралық пәндік олимпиадалардың күнтізбелік жылын лайықты аяқтап, дайындық сапасын тағы да растады. Олар алдыңғы жылдардағы рекордты жаңартты. Мәселен, өткен жылы Дубайда өткен IJSO-да Қазақстан құрама командасы қоржынға үш қола медаль жинаған болатын, – дейді «Дарын» РҒПО директоры Әнуар Ұнайбеков.

Қазақстан құрама командасы республикалық олимпиадалардың жеңімпаздары мен жүлдегерлерінен жинақталды. Олардың ішінде Қарағанды қаласы Н. Нұрмақов атындағы мамандандырылған мектеп-интернатының 10-сынып оқушысы Мадина Имашева бар. Ол күміс медаль жеңіп алды. Жетекшісі – физика пәнінің мұғалімі Ерсін Әділбаев.

– Мадина – физика пәнінен облыстық олимпиада құрамасының мүшесі. Қазақстан құрамасына кіру – біз үшін үлкен жетістік. Мадинаның әртүрлі деңгейдегі олимпиадаларда көптеген жетістіктері бар. Бірақ бұл Мадинаның алғашқы халықаралық жарысы және алда көптеген сынақтар бар. Біздің мақсатымыз – IphO Халықаралық физика олимпиадасына қатысу. Теориялық-эксперименттік бөлімде әлі де көп жұмысымыз бар, – деді Н. Нұрмақов атындағы физика пәнінің мұғалімі Ерсін Әділбаев.