Теміртаулық ұстаз республикалық кәсіби шеберлік байқауында үздік атанды

Теміртау индустриалды-технологиялық колледжінің өндірістік оқыту шебері Дина Хуантхан құрылыс саласы колледждерінің педагогтары арасында республикалық кәсіби шеберлік байқауында бірінші орынға ие болды. Оған еліміздің 16 облысынан өңірлік кезеңдердің жеңімпаздары қатысты.

Қарағандыда құрылыс саласының техникалық және кәсіптік, орта білімнен кейінгі білім беру педагогтері арасында II Республикалық кәсіптік шеберлік конкурсының қорытындысы шығарылды. Ол Қарағанды техникалық-құрылыс колледжінің базасында өтті.

– Байқау екі кезеңнен тұрды – теориялық және практикалық. Алдымен қатысушылар тестілеуден өтті, содан кейін кірпіш қалау, жылдамдыққа арналған қабырға суреттері, тұсқағаздар желімделіп, үй тапсырмасын ұсынды. Мұндай байқау шеберлерге өздерін көрсетуге жақсы мүмкіндік береді, – деп есептейді Қарағанды облысының білім беруді дамыту ОӘО директорының орынбасары Татьяна Нартова. – Байқау барысында педагогтар кәсіби дағдылары мен машықтарын, инновациялық тәсілдерді қолдану мен жоғары еңбек мәдениетін көрсетті.

Конкурстық комиссия жұмысының қорытындысы бойынша «Бояу және сәндік жұмыстар» санатында бірінші орынды Теміртау индустриалды-технологиялық колледжінің өндірістік оқыту шебері Дина Хуантхан иеленді. Ол колледжде 13 жыл жұмыс істейді. Студенттерді «Құрылысшы» мамандығы бойынша оқытады.

– Мұғалімдер өз білімдері мен дағдыларын үнемі жетілдіріп отыруы керек деп санаймын. Кәсіби шеберлік конкурстары бізге өзімізге сыни көзқараспен қарауға мүмкіндік береді, шеберлерге өздерінің кәсіби маман екенін дәлелдеуге жақсы мүмкіндік береді, – дейді Дина Хуантхан. – Уақыт бір орында тұрмайды, сондықтан үнемі білімімізді жетілдіріп отыру керек. Құрылыс қызметтері нарығында күн сайын жаңа тенденциялар пайда болады. Жастарға өз біліміміз бен дағдыларымызды беру үшін біз оларды бірінші болып үйренуіміз керек.

Жеңімпаздар ақшалай сертификаттармен марапатталып, қатысушыларға алғыс хаттар табысталды.