Қарағандыда Нүркен Әбдіровті еске алуға арналған республикалық турнир басталды
Қарағанды "Жастар" спорт кешенінде Кеңес Одағының Батыры Нүркен Әбдіровті еске алуға арналған республикалық турнирге Қазақстанның барлық облыстарынан, сондай-ақ Қырғызстаннан, Өзбекстаннан және Грузиядан 600-ден астам спортшы жиналды.
Олар еркін, әйелдер және грек-рим күресі бойынша дайындықтарын көрсетеді.
Турнирге қатысушыларды спорт және дене шынықтыру істері комитетінің төрағасы Самат Ерғалиев пен Қарағанды облысы әкімінің орынбасары Ербол Әліқұлов қарсы алды. Олар спортшыларға сәттілік тіледі. Ашылу салтанатына Нүркен Әбдіровтың ұрпақтары да қатысты.
– Турнирді жақсы ұйымдастырған. Жоғары деңгейде. Атамыздың ерлігі туралы естелік ұмытылмайтынына қуаныштымын, – деп атап өтті ұшқыштың немересі Данияр Әбдіров.
Бастапқы жекпе-жек алдында қарағандылық палуандар Грузиядан келген әріптестерімен бірлескен жаттығу өткізді. Грузия командасының бас жаттықтырушысы жергілікті палуандардың дайындығын жоғары бағалады.
– Турнир өте әдемі және қарқынды болады. Мұндай жарыстарға қатысу біз үшін үлкен мәртебе. Бізде өте күшті құрам бар. Әлем және Еуропа чемпионаттарының барлық дерлік жүлдегерлері. Олардың арасында осы жарыстардың чемпиондары да бар. Қазақстандық палуандармен жекпе-жекті тамашалау өте қызықты болады. Қазақстанға бірінші рет келіп тұрмыз. Біз сіздердің күресіңізді өте жақсы көреміз. Ең мықтысы жеңсін! – деді Зураб Чигладзе.
Қатысушылардың дайындығын біріншіліктің бас төрешісі Ксения Дробина да атап өтті. 2004 жылы ол өзі Нүркен Әбдіров атындағы турнир спортшыларының қатарында болды, ал бүгін төрешілер алқасын басқарады. Оның айтуынша, жарыстың танымалдығы мен беделі жыл сайын артып келеді.
– Биылғы жылы Нүркен Әбдіровтің ерлігіне 80 жыл толып отыр және турнирге қатысушылар саны жыл сайын артып келе жатқанын атап өткім келеді. Бірінші орын алған жеңімпаздар 400 мың теңгеден, екінші орын үшін 200 мың теңгеден, Үшінші орын үшін 100 мың теңгеден алады, – деп атап өтті халықаралық санаттағы бас төреші Ксения Дробина.
Қарағандылық Асхат Хаджиев осындай ауқымды жарысқа алғаш рет қатысып отыр. 57 келіге дейінгі салмақ дәрежесінде ол Қырғызстаннан келген спортшыға қарсы шығып, оны 16-6 есебімен жеңді.
– Менің қарсыласым өте жақсы дайындалған. Мықты қарсылас, тамаша турнир, – дейді Асхат Хаджиев.
Турнир 5 желтоқсанға дейін жалғасады. Жарыс үш бөлікке бөлінді. Алғашқы күндері кілемде еркін күрес палуандары күш сынасады. Әрі қарай әйелдер күресі бойынша жарыстар өтеді. Соңында грек-рим күресінің өкілдері өнер көрсетеді.
Нүркен Әбдіровті еске алу турнирі биыл 54-ші рет өтуде. Ол ұшқыштың ерлігінің 80 жылдығына арналған.
Турнир жеңімпаздары автоматты түрде спорт шеберлері мен ҚР спорт шеберіне үміткерлердің біліктілігін алады. Ұйымдастырушылар жеңімпаздарға ақшалай сертификаттар дайындады. Турнирдің жалпы жүлде қоры – 25 миллион теңге.
