Шет ауданының Жұмыскер ауылында наубайхана ашылды

Шет ауданының Жұмыскер ауылында наубайхана ашылды. Кәсіпкер Төлеутай Жұмашев 600 мың теңге көлемінде аудан әкімінің грантын алды. Енді ауыл тұрғындарын қолайлы бағамен нанмен қамтамасыз етеді.

Наубайхана ашылғанға дейін тұрғындар дүкендерде басқа жақтан жеткізілетін нанның бағасы 160 теңгеге дейін өсті деп бірнеше рет шағымданды. Бұл мәселе Жұмыскер ауылы кіретін Тағылы ауылдық округінің әкімі Нұркен Ариновтың есептік кездесуінде де көтерілді. Содан кейін кәсіпкер Төлеутай Жұмашев бұл істі қолға алды. Ол тұтыну нарығын зерттеді, айналасындағы ауылдардағы және аудан орталығындағы сауда нүктелерінің иелерімен келіссөздер жүргізді. Енді күн сайын 95 теңгеден жаңа піскен нан жеткізеді. Наубайхана күніне 350–400 нан пісіреді.

– Жұмыскер ауылының тұрғындарынан басқа, наубайхана күн сайын Төменгі Қайрақты, Қарасаз, Қызылту және аудан орталығын жаңа піскен нанмен қамтамасыз етеді. Кәсіпкер Шет ауданының кәсіпкерлерін қолдау бағдарламасы аясында 600 мың теңге көлемінде грант алып, қосымша пеш сатып алды. Қазір наубайханада жұмыссыз қалған екі ауыл тұрғыны жұмыс істейді, – деді Нұркен Аринов.