Қарағанды облысында қоғамдық көлік мәселелері талқыланды
Жолаушылар автобусының жүргізушілері кесте бойынша жұмыс істеп жатыр, жолаушылар жинаймыз деп жарысу жоқ – бұл жағдайға Қарағандыда сараланған тарифті енгізуге әсер етті. Бұл туралы автопарк басшылары Қарағанды облысының әкімі Жеңіс Қасымбекке онлайн-форматта өткен кеңесте есеп берді.
Өңір басшысы тұрғындардың автобустар жұмысына қатысты шағымдары әлі де түсіп жатқанын атап өтті. Қарағандылықтар қоғамдық көлікті ұзақ күтетініне және салондардың лық толы болатынына наразылықтарын білдірді.
Облыста 203 тұрақты маршрут жұмыс істейді. 39 тасымалдаушы қызмет көрсетеді, олардың автопарктерінде 900-ден астам автобус бар.
– Биылғы жылы пандемияға байланысты жабылған жеті ауданаралық бағыт бойынша қозғалыс қалпына келтірілді. Серіктес қалалар Теміртау, Шахтинск, Саран, Абай қалалары, сондай-ақ Топар және Шахан кенттері бағытындағы алты ауданаралық маршруттармен қамтылған. Жыл сайын осы маршруттарда 5,5 миллионнан астам адам тасымалданады. Желіде № 3 және 5 автопарктер жұмыс істейді, – деді Жолаушылар көлігі және автомобиль жолдары басқармасының басшысы Сәбит Оспанов.
Ол сондай-ақ автобустардың желіге шығуына күнделікті бақылау жүргізіліп жатқанын атап өтті. Жолаушылар Bus09 қосымшасы арқылы нақты уақыт режимінде қала маңындағы автобустардың қозғалысын бақылай алады.
Осы жылдың қыркүйек айында Қарағанды – Абай бағыты бойынша "Мерседес" маркалы 10 автобус іске қосылды.
Қарағанды – Теміртау және Қарағанды – Шахан бағыттарында әлі де түйіткілді мәселелер қалып отыр. Бұл проблемалар көліктердің ескіруі және жүргізушілердің жетіспеушілігімен түсіндіріледі. Қарағандыда 224 бос жұмыс орны бар. Көлікті жаңартуға келетін болсақ, № 5 автопарк өнеркәсіпті дамыту қорына 58 жаңа автобус – 50 қалалық және 8 қала маңындағы автобус сатып алуға өтінім берді. № 3 Автопарк келесі жылы 30 жаңа автобус сатып алмақшы.
– Жолаушылар тарапынан шағымдарды қадағалап, жедел әрекет ету қажет. Автокөлік комбинаттары барлық міндеттемелерін орындауы тиіс. Өткен жылы және биыл біз субсидиялауды едәуір арттырдық. Көлікті жаңарту процесі жүріп жатыр, электронды билетті енгізу – мұның бәрі сервисті жақсартуға бағытталған, – деп атап өтті Жеңіс Қасымбек.
Алайда шағымдар тек тасымалдаушыларға ғана қатысты емес. Қоғамдық көлікте жолақы төлемейтіндер көбейіп кетті. Қазір Қарағандыда № 3 автопарктің 50 бақылаушысы және eBay компаниясының 30 бақылаушысы жұмыс істейді. Әзірге олар жолаушыларға жол жүру жауапкершілігі туралы ескерту жасап жатыр. Желтоқсан айында сөзден әрекетке көшеді. Бақылаушылар полиция қызметкерлерімен бірге шығып, жол ақысын төлемегендерге айыппұл салады.