Қарағандыда өткен республикалық байқауда 40-қа жуық вокалист дәстүрлі әндерді орындауда бақ сынады

Қарағандыда өткен Мәди Бәпиұлы атындағы дәстүрлі орындаушылардың республикалық байқауына 18-ден 40 жасқа дейінгі 40-қа жуық вокалист қатысты.

Шығармашылық жарыс 2005 жылдан бері өткізіліп келеді. Биыл байқауға қатысушылардың саны басқа жылдарға қарағанда көбірек болды.

– Байқауға Қазақстанның түкпір-түкпірінен әншілер келеді. Биыл орындаушылардың рекордтық саны тіркелді, 40-қа жуық адам. Бұған дейін әр жылдары 20-дан 28-ге дейін болған. Әр қатысушы алты ән орындады, оның екеуі Мәди Бәпиұлының мұрасына тиесілі, – деді Қали Байжанов атындағы концерттік бірлестік директорының өнер саласындағы орынбасары Ғазиз Салықұлы.

Қазақ ұлттық университеті колледжінің 3-курс студенті Ариана Берғазықызы мұндай конкурсқа қатысу үлкен мәртебе екенін атап өтті.

– Мен Астанада тұрамын, бірақ Мәди Бәпиұлының жерлесімін, Қарқаралы қаласында дүниеге келгем. Мен Мәди Бәпиұлының "Қарқаралы" және "Қаракесек" әндерін орындадым. Бала кезімнен түрлі байқауларға қатысып, бірнеше рет жүлдегер атандым, – деп бөлісті Ариана Берғазықызы.

Бұқар Жырау ауданының тұрғыны Қуандық Төкенов алғаш рет Мәди Бәпиұлы атындағы дәстүрлі орындаушылар байқауына қатысты.

– Мен "Шабыт" өнер академиясын бітірдім, қазір Доскей ауылының өнер мектебінде жұмыс істеймін. Байқауда Мәди Бәпиұлының "Шіркін-ай" және "Қарқаралы" және басқа да авторлардың әндерін орындадым. Менің ойымша, мұндай байқаулар өте қажет: олар орындаушылардың шығармашылық өсуіне қызмет етеді, – дейді Қуандық Төкенов. 

Гран-приді қазылар алқасы алматылық Диас Мұратханға ("Алатау" театры) берді. Бірінші орынды Алматылық Ұзақбай Нұрболат (Құрманғазы атындағы ұлттық консерватория) иеленді. Сондай-ақ дипломанттар мен арнайы жүлделердің иегерлері анықталды.

Жеңімпаздар дипломдармен және ақшалай сертификаттармен марапатталды.

Шара байқауға қатысушылар мен қазылар алқасының қатысуымен ұйымдастырылған гала-концертпен аяқталды.

Фото Тимур Кудериновтікі