Қарағандыда қоғамдық көлік жүргізушілерінің мәдениетін жоғарылату ұсынылды
Қарағандыда қоғамдық көлік жүргізушілері мен бақылаушыларды қоғамда өзін қалай ұстау керектігі үйретіледі. Азаматтық сектор өкілдері қоғамдық көлік қақтығыс аймағы болуын тоқтатуға қатысуға дайын екендерін жеткізді.
– Біріншіден, автопарктер «Біз халыққа қызмет көрсетеміз, яғни қызметті бірінші орынға қоюымыз тиіс» деген қағиданы нақты білуі керек. Сонымен қатар тәсілдерді түбегейлі өзгерту, қызмет көрсету сапасын жоғарылатуды үйренуі қажет. Жұмысқа қабылдау кезінде біліктілік талаптары да болуы тиіс, – дейді Қазақстан Азаматтық альянсының вице-президенті Гүлнар Құрбанбаева. – ҮЕҰ зертханасының базасында біз қоғамдық көлік қызметкерлеріне қарым-қатынастың, коммуникацияның, психологиялық тұрақтылықтың қарапайым мәдениет дағдыларын беретін курстар ұйымдастыруға дайынбыз. Бұл жұмыс жүйелі болуы үшін алға жылжуымыз маңызды. Біз одан әрі де сүйемелдеуді жүргізе аламыз.
Оның айтуынша, мұндай курстардың бағдарламасы әзірленуде. Жақында қоғам қайраткерлері тасымалдаушыларға нақты өтініммен шығады.
Тағы бір идея – автобустарда сыпайылық күндерін, «рахмет» күндерін және кейбір жағымды акциялар өткізу. Гүлнар Құрбанбаеваның айтуынша, бұған жастар ұйымдары жұмылдырылуы мүмкін.
– Жаңа жыл қарсаңында кондуктор қыз автобус салонын қалай безендіргенін еске түсірсеңіздер, адамдар қуанып, Instagram-да мыңдаған қаралым жинаған бейнелермен бөлісті. Мұндай акциялар кем дегенде көңіл-күйді көтереді, өзара жағымды көңіл-күй қалыптастырады. Оған керемет көп шығындалмаса да ерекше атмосфера қалыптасады, – деп атап өтті Қазақстан Азаматтық альянсының вице-президенті.