Республикалық фестивальде Қарағанды қаздрамтеатры үш марапатқа ие болды

Астанада көрнекті театр және кино актрисасы Шолпан Жандарбекованың 100 жылдығына арналған XXVIII Республикалық драма театрларының фестивалі өтті.

Сәкен Сейфуллин атындағы Қарағанды қазақ драма театрының көркемдік жетекшісі Айдын Салбан Шерхан Мұртазаның "Текебұрқақ" повесі бойынша пластикалық морфоз қойғаны үшін "Үздік режиссер" атағын жеңіп алды.

Фестивальге еліміздің әр өңірінен 10 театр қатысты. Елордалық көрермендердің назарына театр сүйер қауым арасында танымал болған түрлі жанрлық спектакльдер ұсынылды.

– Бастапқыда 50-ге жуық театр өтінім берді, сарапшылар 10 спектакльді таңдады. Олардың арасында біздің "Текебұрқақ" пластикалық морфоз да болды. Бұл жанрда спектакль алғаш рет қойылды. Біз үздік режиссура үшін ғана емес, Шолпан Жандарбекованың шәкірттерінің "Шолпан жұлдыз" сыйлығын да алдық. Шолпан Жандарбекова дүниеге келген Қарқаралы ауданының әкімі арнайы сыйлық тағайындады, ол да бізге бұйырды. Біз одан әрі жұмыс істеп, өз көрермендерімізді таң қалдырамыз, – деді Қаздрамтеатрдың директоры Құрман Қалымов.