Қарағандының NIS оқушылары балалар үйінің тәрбиеленушілеріне бағдарламалау негіздерін үйретеді

Қарағанды Назарбаев Зияткерлік мектебінің "Мейірімділік Көпірі" клубының еріктілері балалар үйінің тәрбиеленушілерін бағдарламалау негіздеріне үйретеді.

Бірінші сабақ осы сенбіде өтеді. Қазір балалар үйінде қажетті компьютерлік жабдықтарды орнату аяқталуда.

Балалар үйінің тәрбиеленушілерін бағдарламалауға оқыту бойынша әлеуметтік жобаның бастамашысы – 12-сынып оқушысы Томирис Мадиева.

Ол ZHAS PROJECT – 2022-ден өз жобасын жүзеге асыру үшін грант алды. Қыз бала қажетті құрал-жабдықтар сатып алып, мектеп клубының еріктілерімен бірге оқу жоспарын жасады және осы сенбіде сабақ өткізуге кіріспекші.

"Назарбаев Зияткерлік мектебінің "Мейірімділік Көпірі" клубының педагогтары мен еріктілері Қарағанды балалар үйінің дамуында мүмкіндігі шектеулі тәрбиеленушілеріне арналған әлеуметтік жобаны іске асыру бойынша жұмысты бастады, – дейді NIS-те. – Жақында 9–11 сынып оқушыларынан құралған волонтерлер информатика мұғалімдері Әйгерім Әбдікашева, Людмила Устинова және клуб жетекшісі Гүлнар Сейітованың басшылығымен ұйымдастырушылық ақпараттық кездесу өткізді. Олар балалар үйінің тәрбиеленушілерін курстың жоспарымен және мазмұнымен таныстырды, сабақ өткізу кестесі, топтарға бөлу туралы айтып, сұрақтарға жауап берді".

Сондай-ақ, еріктілер балаларды біріктіруге бағытталған тренингтер өткізді, олар бір-бірімен жақынырақ танысып, қызығушылықтары туралы айтып, болашақ жоспарлары және армандарымен бөлісті.

– Жобаның арқасында еріктілер Peer to Peer әдісі бойынша оқыту тәжірибесіне ие болады, нақты іс-әрекеттерде әлеуметтік тәжірибеге ие болады, белсенді өмірлік ұстанымы бар тұлға ретінде дамитын болады, – деп атап өтті еріктілер клубының жетекшісі Гүлнар Сейітова.