Қарағанды облысында жетім балалар мен ауыл оқушыларын жоғары оқу орындарына дайындауға көмек көрсетіледі

Қарағанды облысында "Репетитор" пилоттық жобасы іске қосылды. Ауыл мектептерінің түлектерін, әлеуметтік осал отбасылардың балаларын, сондай-ақ балалар үйлерінің тәрбиеленушілерін онлайн-курстарда ҰБТ-ға тегін дайындайды. Бұл оларға жоғары оқу орындарына түсуге және еңбек нарығында сұранысқа ие кәсіпті үйренуге көмектеседі.

Білім берудің қолжетімділігі мен сапасы туралы өңір басшысы Жеңіс Қасымбектің қатысуымен өткен Қоғамдық кеңес отырысында сөз болды.

Білім басқармасының басшысы Гүлсім Қожахметованың баяндамасынан кейін әңгіме ашық микрофон форматында жалғасты. Кеңес мүшелері өз сұрақтарын қойып, ұсыныстарын білдірді. Балалардың қауіпсіздігі, суицидтің алдын алу, инклюзивті ортаны дамыту және балалар үйлерінен шыққандардың болашағы туралы өткір тақырыптар қозғалды.

– Мен балалар үйіне барып, балалармен сөйлесемін. Көбісі ақылды, талантты, бірнеше тілдерді біледі. Бірақ болашақ туралы әңгіме қозғағанда олар көбінесе әлеуетті мамандықтарды таңдамайтыны белгілі болды. Сондықтан біз оларға осы тұрғыда көмектесу идеясымен шықтық. Бастамашыл жас айтишниктер тобы бар. Өткен жылы олар ауылдық мектептердің жүзге жуық түлегін ҰБТ-ға тегін дайындады. Біз мәселені талқыладық, аудиторияны көбейту және кеңейту үшін бюджеттен тыс қаражат таптық. Соның ішінде олар ЖОО-ға түсуге балалар үйінің балаларын да дайындайды, – деді Жеңіс Қасымбек.

Өңірде оқушылар мен педагогтар үшін басқа да жобалар жүзеге асырылуда. Мысалы, үздік мектептер өздерінің жетістік формулалары нәтижелерімен әлдеқайда төмен әріптестерімен бөліседі. Кәсіби өсу мектебі сынып жетекшілері үшін ұйымдастырылады - оларды оқыту үшін психологтар, жаттықтырушылар мен медиаторлар шақырылады. Ауыл мектептерінде "Қала – ауыл", сырттай "Жас математик", "Виртуалды мектеп" жобалары іске қосылды.

Облыс әкімі қоғамдық кеңеспен тығыз жұмыс істеуге ниетті.

– Барлығыңызда белсенді азаматтық ұстаным бар. Біз үнемі кездесіп отырамыз. Бізде жұртшылықтың қатысуымен шешілуі тиіс маңызды мәселелер көп, – деп атап өтті Жеңіс Қасымбек.