Балқаштағы Тәуелсіздік алаңында амфитеатр, құрғақ субұрқақ және Ағыбай батырдың дулығасы түріндегі күнқағарлары бар орындықтар пайда болады

Балқашта Тәуелсіздік алаңы абаттандырылуда. Онда амфитеатр, құрғақ субұрқақ және Ағыбай батырдың дулығасы түріндегі күнқағарлары бар орындықтар орналасады.

Абаттандыру жұмыстары өткен жылдың тамыз айында басталды. Ескі Тәуелсіздік алаңына шөлейт аймақ қосылды. Қазір электр қуаты өткізілуде және қырлы тастар төселіп жатыр.

– Ескі бөлікте Ағыбай батыр ескерткішін, субұрқақты қайта жаңарту және сәулеттік күркелерді авторлық шатырларға ауыстыру басталды. Олар ою-өрнекпен көмкерілген темірден жасалған батыр дулығасы түрінде болады, – дейді Балқаш қаласының ТКШ, жолаушылар көлігі және автомобиль жолдары бөлімінің сектор меңгерушісі Нұржас Жақытай. – Сондай-ақ, алаңға перголалар – көлеңкелі шатырлар орнатылады, Hi-Tech стиліндегі шамдар және жарықтандырылған полимерлі гүлзарлар пайда болады.

Алаңның жаңа бөлігінде 50 орындық амфитеатр, сахна, шатыры бар балалар алаңы, құрғақ субұрқақ салынады.

– Бұл Қарағанды облысындағы ең үлкен құрғақ субұрқақ болады. Оның ауданы 140 шаршы метрді құрайды. Сондай-ақ, жаңа бөлікте біз перголаларды, жарықтандыру тіректерін орнатамыз. Көгалдандыру 4000 шаршы метрді құрайды. Газон және жас ағаштар отырғызды. Жұмыстар күзде басталады. Жоба автоматты суаруды көздейді, – деді Нұржас Жақытай.

Сонымен қатар, алаңда архитектуралық мәрмәр орындықтар мен мәрмәр ұнтақтан жасалған тіреу қабырғалары пайда болады.

Абаттандыру бойынша жұмыстарды авторлық және техникалық қадағалау тексереді. Шарт бойынша тапсыру мерзімі – осы жылдың қазан айы.