Қарағанды облысында бірінші сыныпқа құжаттарды қабылдау 1 тамызда аяқталады

Қарағанды облысы мектептерінің бірінші сыныптарына құжаттар 1 тамызға дейін қабылданады. Өтінішті онлайн, сондай-ақ қағаз түрде беруге болады. 

Өңірлік коммуникациялар қызметі алаңында өткен брифингте Білім басқармасының мектепке дейінгі және орта білім беру бөлімінің басшысы Гүлдана Нұрсұлтан бірінші сыныпқа балаларды қабылдау ережелері туралы айтып берді.

– Өтініштерді қабылдау электрондық үкімет egov.kz порталы және e.bilimal.kz жүйесі арқылы электрондық форматта жүргізіледі, сондай-ақ қағаз түрінде. Бүгінгі таңда облыс бойынша ата-аналардан 17 мыңнан астам өтініш келіп түсті, – деп атап өтті Гүлдана Нұрсұлтан.

Бірінші сыныпқа қабылдау үшін келесі құжаттарды ұсыну қажет:

- ата-аналардан (немесе оларды ауыстыратын тұлғалардан)өтініш;

- баланың туу туралы куәлігінің көшірмесі;

- "баланың денсаулық паспорты" 026/у-3 нысаны бойынша денсаулық жағдайы туралы құжат;

- 063/у нысаны бойынша денсаулық жағдайы туралы құжат;

- 3х4 екі фотосурет.

Өтініш бір жұмыс күні қаралады.