Судағы қауіпсіздік: еріктілер мен құтқарушылар су айдындарында рейд жүргізіп жатыр

Қарағандылық еріктілер құтқарушылармен және полицейлермен бірлесіп «Судағы қауіпсіздік» акциясы барысында Федоров су қоймасындағы демалушыларға түсіндіру жұмыстарын жүргізіп, жадынамалар таратты.

Мамыр айының басынан бастап осы уақытқа дейін облыстың су айдындарында 210 профилактикалық рейд және 517 патрульдеу ұйымдастырылды, суда жүру ережелері бойынша 16 809 ақпараттық парақ таратылды.

ТЖД хабарлағандай, облыс бойынша 83 бұқаралық демалыс орны анықталып, жеке меншік иелеріне бекітілді.

2017 жылдан бастап су айдындарының қауіпті учаскелерінде 1515 ескерту және тыйым салу белгілері орнатылды, олардың 210-ы осы жылы пайда болды, сондай-ақ су айдындарындағы қауіпсіздік ережелері көрсетілген 83 көрнекі стендтермен жабдықталған.

«Балалар қауіпсіздігіне ерекше көңіл бөлінеді, өйткені демалыста балалар негізінен ересектер тарапынан тиісті қараусыз қалады. Тұрғындардың қауіпсіздігін қамтамасыз ету үшін Федоров, Самарқанд, Шерубай-Нұра, Кеңгір су қоймаларының жағалауларында, сондай-ақ Балқаш және Айнакөл көлдерінде орналасқан ТЖД-ның алты құтқару бөлімшесі жоғары дайындық режимінде», — деп хабарлады Қарағанды облысының ТЖД.