Қазақстанда тауарды чексіз қайтаруға немесе айырбастауға болады

Көбінесе сатушылар өздерінің заң тұрғыда сауатсыздығына байланысты тұтынушыларды чек болмаса, тауарды айырбастауға немесе қайтаруға болмайды деп адастырады. Мұндай жағдайда чектің қаншалықты маңызды екенін Нұр-Сұлтан қаласы Тұтынушылардың құқықтарын қорғау Департаментінің басшысы Шыңғыс Сүйінбаев түсіндірді.

— "Тұтынушылардың құқықтарын қорғау туралы" Қазақстан Республикасы Заңының 30-бабының 1-тармағына сәйкес, тауарды сатып алу фактісін растайтын құжат жоғалған немесе берілмеген жағдайда, егер тұтынушы осы сатушыдан (дайындаушыдан) сатып алу фактісін дәлелдесе, тауарды айырбастау немесе қайтару жүзеге асырылуы тиіс, — дейді Шыңғыс Сүйінбаев. — Мысалы, сіз күртеше сатып алып, үйге келіп, онда жасырын ақау таптыңыз. Сіз дүкенге келесіз, сатушы бұл ақауды көреді. Ол бар екенін мойындайды және сізде чек бар-жоғын сұрайды. Ал сіз оны лақтырып жібердіңіз және чек болмағандықтан сізге тауарды айырбастаудан немесе ақшасын қайтарып беруден бас тартады. Бұл тұтынушылардың құқықтарын қорғау туралы қолданыстағы заңнаманы бұзу болып табылады. Сіз сатып алу фактісін, егер ол аударма арқылы жүзеге асырылса, QR, егер жақын жерде куәгер бола алатын басқа сатып алушылар болса немесе дүкенде бейнебақылау камералары болса, дәлелдей аласыз.

Егер сіз тұтынушылық құқықтардың бұзылуына тап болсаңыз, өз қалаңыздың немесе облысыңыздың тұтынушылардың құқықтарын қорғау департаментіне, сондай-ақ E-otinish немесе E-tutynushy электрондық платформалары арқылы жүгінуге болады.

Қазақстан Республикасы Сауда және интеграция министрлігі тұтынушылардың құқықтарын қорғау Комитетінің ақпараты бойынша