Қазақстанда референдум қорытындысы шығарылды
Орталық референдум комиссиясының төрағасы Нұрлан Әбдіров ҚР ОРК отырысында Конституцияға өзгерістер мен толықтырулар енгізу жөніндегі республикалық референдумның қорытындыларын жариялады. Елдің барлық өңірлерінде дауыс беруге қатысқан азаматтардың 77,18 пайызы немесе 6 миллион 163 мың 516 адам конституциялық түзетулерді жақтап, дауыс берді.
Республикалық референдумға шығарылған Конституцияға өзгерістер мен толықтырулар, егер олар үшін облыстардың, республикалық маңызы бар қалалардың және астананың кемінде үштен екісінде дауыс беруге қатысқан азаматтардың жартысынан астамы жақтап дауыс берсе, қабылданды деп есептеледі.
Референдумға қатысу құқығы бар Қазақстан Республикасы азаматтарының жалпы саны 11 миллион 734 мың 642 адамды құрады. 2022 жылғы 5 маусымда Қазақстан Республикасының Конституциясына өзгерістер мен толықтырулар енгізу бойынша бүкілхалықтық дауыс беруге 7 млн. 985 мың 769 адам немесе референдумға қатысу құқығы бар азаматтар санының 68,05% қатысты. Осылайша, «Республикалық референдум туралы» Конституциялық заңның 31-бабына сәйкес референдум өтті деп есептеледі.
Конституциялық түзетулерге қарсы дауыс берген азаматтардың саны 18,66 пайызды немесе дауыс беруге қатысқандардың 1 миллион 490 мың 470 адамын құрады. Осылайша, «Республикалық референдум туралы» Конституциялық заңның 31, 34-баптары негізінде елдің Негізгі Заңына ұсынылған өзгерістер қабылданды деп есептеледі.
Референдумда қабылданған Конституцияға өзгерістер мен толықтырулар референдумның қорытындылары туралы ресми хабар жарияланған күннен бастап күшіне енеді.
Референдумның қорытындыларын шығару кезіндегі басқа да мәселелерге қатысты. Жауаптардың екі нұсқасы да таңдап алынған, яғни жарамды деп танылған, алайда дауыстарды санау кезінде ескерілмейтін бюллетеньдер саны 1,58 % немесе 125 мың 859 бюллетеньді құрады.
Өзге бюллетеньдер, яғни белгіленбеген үлгідегі не дауыс берушілердің ерік білдіруін анықтау мүмкін емес бюллетеньдер жарамсыз деп танылады. Мұндай бюллетеньдердің саны 2,58% немесе 205 мың 924 бюллетеньді құрады.
Референдумның қорытындыларын шығару кезінде Қазақстан Республикасы Орталық референдум комиссиясы қорытынды шығару барысында Алматы қаласы аумақтық комиссиясының өтінішін назарға алды. Аумақтық комиссия ұсынған материалдардың негізінде, «Республикалық референдум туралы» Конституциялық заңның 21, 31-баптарына сәйкес Қазақстан Республикасының Орталық референдум комиссиясы әкімшілік-аумақтық бірліктің жекелеген учаскесінде референдум өткізуді жарамсыз деп таниды. Осыған байланысты Алматы қаласының № 2 учаскесіндегі дауыс беру нәтижелері референдумның түпкілікті қорытындыларына енгізілмеді.
ҚР Орталық референдум комиссиясы отырысының қорытындысы бойынша «2022 жылғы 5 маусымдағы республикалық референдумда дауыс беру қорытындылары туралы» қаулы қабылданды.