Қарағанды облыстық мәслихатын қайта ұйымдастыру туралы шешім қабылданды

Қарағанды облыстық мәслихаты Ұлытау облысының құрылуына байланысты бөлінеді. Қайта ұйымдастыру туралы шешім кезектен тыс XIV сессияда қабылданды.

– Ел Президентінің "ҚР әкімшілік-аумақтық құрылысының кейбір мәселелері туралы" Жарлығына сәйкес Ұлытау облысы құрылды. Осы құжатты іске асыру шеңберінде жергілікті өкілді орган – Ұлытау облысының мәслихатын қалыптастыру қажет. Құрамында 26 депутат бар Қарағанды облыстық мәслихатына және 12 депутаттан тұратын Ұлытау облыстық мәслихатына бөлу арқылы Қарағанды облысының мәслихатын қайта ұйымдастыру ұсынылады, – деп түсіндірді Қарағанды облыстық мәслихатының хатшысы Серік Өтешов.

Бөлу кезінде олар депутаттардың тұрғылықты жері мен ресми тіркелген мекенжайына назар аударды, деді ол.

Депутаттар бұл шешімге дауыс берді. Ол 2022 жылғы 8 маусымда күшіне енеді.

– Бұл маңызды шешім. Жалпы екі өңір де өз дамуын жалғастырады. Барлық белгіленген жоспарлар орындалады, – деп атап өтті Қарағанды облысының әкімі Жеңіс Қасымбек.

Естеріңізге сала кетейік, Мемлекет Басшысы Қасым-Жомарт Тоқаев 2022 жылғы 4 мамырда "Қазақстан Республикасының әкімшілік-аумақтық құрылысының кейбір мәселелері туралы" Жарлыққа қол қойды. Жарлық 2022 жылғы 8 маусымнан бастап қолданысқа енгізіледі.