Қарқаралы ауданының Атығай Шанин атындағы халық театры облыстық байқаудың бас жүлдесін жеңіп алды

Қарқаралы ауданында Облыстық халық театрлары байқауының қорытындысы шығарылды. Бас жүлде Атығай Шанин атындағы театрға берілді, ол көрермендерге Кеңес Жұмабековтың "Адасқандар" драмасын ұсынды.

Биыл облыстық халық театрлары байқауы актриса Шолпан Жандарбекованың туғанына 100 жыл толуына арналды.

Қарқаралы тұрғындарына тек жергілікті әртістердің ғана емес, Ұлытау және Шет аудандарынан келген актерлердің де өнерін тамашалауға мүмкіндік берілді. Кеңес Жұмабековтың "Адасқандар" драмасы оларға ерекше әсер қалдырды. Қойылымға 15 адам қатысты. Талантты актерлік ойын арқасында Атығай Шанин атындағы халық театрының ұжымы байқаудың бас жүлдесіне ие болды.

– Бұл драма біздің көрерменнің жүрегінен орын алды. Шығарманың өзі өте терең және басты кейіпкерлердің шынайы сезімдерін ашады. Біз актерлеріміздің еңбегін жоғары бағаланғанына қуаныштымыз. Бұл бірінші жеңісіміз емес, әрі соңғысы да емес деп үміттенеміз, – деп атап өтті театр режиссері Арайлым Құснидтенова.

Байқауда бірінші орын Ұлытау ауданының "Кеңгір" халық театрына Флорида Буляковтың "Күйеуге шыққан кемпірлер" пьесасының желісі бойынша трагикомедиясы үшін берілді. Екінші орынды Шет ауданы Ақсу-Аюлы кентінің халық театры иеленді. Шығармашылық труппа көрермендерге Тынымбай Нұрмағанбетовтың "Табалдырығыңа табын" драмасын ұсынды. Үшінші болып Қарқаралы ауданы Тәттімбет атындағы ауылының халық театры ұжымы атанды. Актерлер Олжас Жанайдаровтың "Жұт" пьесасын ұсынды.

Ұжымдарды марапаттауға Шолпан Жандарбекованың ұрпақтары қатысып, әртістердің еңбегін жоғары бағалады.

Байқаудың барлық жеңімпаздары дипломдармен, ақшалай сертификаттармен, сондай-ақ арнайы сыйлықтармен марапатталды.