Қарағандының NIS түлегі Гарвард медициналық мектебіне тағылымдамаға шақырылды

Қарағандының NIS түлегі әлемнің үздік жоғары медициналық мектептерінің бірі – Harvard Medical School-ға жазғы тағылымдамаға шақыру алды. Гарвардта Анель Жүнісова есте сақтау, Альцгеймер, клиникалық депрессия және аутизм спектрінің бұзылуы процестерін зерттейді.

Қарағандылық бойжеткен 2018 жылы Назарбаев Зияткерлік мектебін бітіргеннен кейін Оңтүстік Кореядағы Ulsan National Institute of Science and Technology (UNIST) оқу орнына түскен. Ол "Биомедициналық инженерия" және "Бизнес-әкімшілік" мамандықтары бойынша қос диплом бағдарламасын таңдады.

Университетте Анель ғылыммен және қоғамдық қызметпен белсенді айналысты. Ол екі жыл бойы 50 ұлт өкілдерінен тұратын UNIST Халықаралық студенттер ұйымының президенті болды. Сондай-ақ, ол NIS Alumni-дің Оңтүстік Кореядағы филиалын құрды, оның бағдарламасы бойынша жергілікті жоғары оқу орындарына түсуге 600-ден астам оқушы үшін тегін тәлімгерлікті қамтамасыз етуге және түрлі іс-шаралардың көмегімен Қазақстаннан Оңтүстік Кореяға келген студенттерді біріктіруге қаржыландыру бөлінді.

Бұл тәжірибе бойжеткенге Сингапур Ұлттық Университеті жанындағы аурухананың бір бөлігі болып табылатын Сингапур клиникалық зерттеулер институтында (Singapore Institute of Clinical Science) ақылы тағылымдамадан өтуге көмектесті. Ол академиялық демалыс алып, жарты жылға Кореядан Сингапурға көшті.

– Мен бір кездері практикалық тәжірибе жинау туралы шешім қабылдағаныма өте қуаныштымын, өйткені дәл осы жерде педиатриялық неврология бөлімінде армандаған бағытымды таба алдым, – дейді Анель. – Мен 3–7 жас аралығындағы балаларда аутистік бұзылыстың дамуы мен пайда болуын зерттеу бойынша өзімнің зерттеу жобама қаржыландыру ала алдым. Зерттеуім МРТ суреттерін, генетикалық биомаркерлерді және балалардың жалпы психиатриялық жағдайын талдаудың пәнаралық интеграциясына негізделген.

Сингапурдағы тағылымдама кезінде Анель бірден танымал профессорлар мен дәрігерлердің басшылығымен бірнеше жобалармен жұмыс істеді. Бұл оған бір уақытта әртүрлі зерттеу әдістерін игеруге және неврологиялық суреттерді өңдеуге көмектесетін негізгі талдау түрлерімен танысуға мүмкіндік берді.

– Неврология, бағдарламалау және молекулалық биологиядан алынған практикалық білім маған Гарвард медициналық мектебінде жазғы тағылымдамадан өтуге жеткілікті мүмкіндік берді. Бұл менің бұрыннан келе жатқан арманым, – деп атап өтті Анель. – Бірақ Гарвардқа өту өте қиын секілді болып көрінді, өйткені оның медициналық мектебі US News & World Reports Medical School Ranking рейтингісінде №1 болып танылды және өткен жылы оқуға 6914 талапкердің 2,9%-ы ғана қабылданды.

Гарвардта Анель есте сақтау, Альцгеймер, клиникалық депрессия процестерін зерттеп, аутизмді зерттеуді жалғастырады, бірақ жас ауқымын кеңейтеді.

– Мен осы жазда Гарвардта өзімнің тәжірибелік дағдыларымды жетілдіріп қана қоймай, миды зерттеудегі іргелі кітаптардың, нұсқаулықтардың және бағдарламалық жасақтаманың авторларымен иық тіресе жұмыс істей отырып, өз жобаларымды дамытуды жалғастыратыныма әлі күнге дейін сене алар емеспін, – деп бөлісті студент.