Қарағандыға Қарқаралы тарихи-өлкетану мұражайының көрмесі келді
Қарқаралы тарихи-өлкетану мұражайы Қарағандыға "Қарағанды облысы мұражайларының көркем мұрасы" көрмесін алып келді. Экспозицияда қазақ халқының суреттері, музыкалық аспаптары, тұрмыстық заттары, қолдан жасалған түрлі бұйымдар және т. б. қойылған.
Көрмені Қарағанды бейнелеу өнері мұражайында тамашалауға болады.
– Біздің мақсатымыз барлық аудандық мұражайлардың өз экспозицияларын облыс орталығына әкелу. Оған алғаш болып Ақтоғай ауданы қатысты, енді Қарқаралы мұражайы келді. Басқалар да келеді деп үміттенеміз. Қарқаралы мұражайында бай көркем мұра жинақталған. Біз аудандар бойынша экспедицияларға барып, қорлармен танысқан кезде, мұның бәрін Қарағанды бейнелеу өнері мұражайына келушілерге де көрсеткіміз келді. Адамдарға ол қызықты болады деп үміттенеміз, – дейді бейнелеу өнері мұражайының жетекшісі Бибігүл Құдабаева.
Қарқаралы тарихи-өлкетану мұражайы 1977 жылы қоғамдық негізде құрылды, 1980 жылы мемлекеттік аудандық мұражайға айналды. Оның Егіндібұлақ және Ақжол ауылдарында екі филиалы бар.
Қарқаралы мұражайының қорында – 8600, Ақжол мұражайында – 5581, Егіндібұлақ музейінде – 1575 экспонат бар.
– Көрмеге үш мұражайдан 139 экспонат қойылды. Оның ішінде танымал қазақстандық суретшілердің жұмыстары бар. Картиналар Қарқаралының өмірі мен тарихын, табиғатымыздың сұлулығын, адамдардың тұрмысын көрсетеді. Экспозицияда біздің өлкеміздің ұлы тумаларына арналған кенептер бар. Ақын Қасым Аманжоловтың жеке заттарын да әкелдік. Қолдан жасалған бұйымдар да бар. Мұның бәрін бізге аудан тұрғындары берді. Жыл сайын жазда біз экспедицияға шығамыз, артефактілер жинаймыз, олардың тарихын жазамыз. Қарағандыдан кейін Теміртауға баруды жоспарлап отырмыз, – деді Қарқаралы тарихи-өлкетану мұражайының директоры Назым Әбішева.
Көрменің ашылуына халықаралық антиядролық қозғалыстың суретшісі Кәріпбек Күйіков қатысты. Ол мұндай іс-шаралар өскелең ұрпақты тәрбиелеу үшін өте маңызды екенін атап өтті, өйткені әрбір экспонат тарихи құндылыққа ие, оларды құруға өз еңбегін салған ата-бабалардың қолдары мен рухтарының жылуын жеткізеді.
Қарқаралы тарихи-өлкетану мұражайының көрмесі 4 мамырға дейін жалғасады.