"Дәуір тұлғасы": Қарағандыда он төртінші Сағынов оқулары өтті

Қарағанды техникалық университетінде Сағынов оқулары ретінде танымал "Ғылым, білім және өндіріс интеграциясы – Ұлт жоспарын жүзеге асырудың негізі" атты Халықаралық ғылыми-практикалық конференция өтті. Биыл он төртінші оқылым жоғары оқу орнына Қазақстан Ұлттық Ғылым академиясының академигі, техника ғылымдарының докторы және бұрынғы ректор Әбілқас Сағыновтың есімі берілуімен тұспа-тұс келді.

– Университетке Әбілқас Сағыновтың есімін беру – біздің отбасымыз үшін өте маңызды оқиға. Біз жоғары оқу орнының басшылығы мен ұжымына әкеміздің ғылыми мұрасын сақтап, құрметтегені үшін алғысымызды білдіреміз, – деп атап өтті ғалымның ұлы Ниязбек Сағынов. – ҚарТУ-де жыл сайын Сағынов оқулары өткізіледі, талантты жастарды қолдау үшін оның атындағы ректорлық стипендия тағайындалды, тау-кен факультетінің ғимаратында мемориалдық тақта, ал бас ғимараттың алдында ескерткіш орнатылды.  Әкем өз өміріндегі басты міндеттердің бірі ғылым мен Қазақстанның жоғары мектебін дамыту деп санады. Ол ұжыммен бірге политехникалық институтты еліміздегі ең үздік жоғары оқу орындарының біріне айналдырғанын мақтан тұтамын. 

Конференцияға қатысушылар Әбілқас Сағыновты ұлы ұстаз ретінде сипаттайды. Өз баяндамаларында академиктің тау-кен индустриясын дамытуға қосқан баға жетпес үлесі атап өтілді.

– Әбілқас Сағынов көрнекті қоғам және ғылым қайраткері ғана емес, сонымен қатар біздің университеттің негізін қалаушы болды. 1955 жылы сол кездегі тау-кен институтының ректоры болған ол бүкіл өмірін оның дамуы мен қалыптасуына арнады. Отыз жылдан астам уақыт ішінде университет өзінің дана басшылығымен білікті кадрларды даярлауда елеулі табыстарға қол жеткізді және жетекші жоғары оқу орындарының құрамына кірді, – деп атап өтті университет ректоры Марат Ибатов. – Қазіргі уақытта ЖОО алдына техникалық білім беруді дамыту бойынша жаңа міндеттер қойылды. Бүгін біздің университет оларды лайықты орындайды деп сеніммен айта аламыз.

Академиктің немересі Асқар Сағынов та атасы туралы естеліктерімен бөлісті.

– Атам ойшыл және нағыз көшбасшы болды. Ол әрдайым жаңа нәрселерді үйренуге ұмтылды, тынымсыз еңбек етті, – дейді Асқар Сағынов. – Ол облыс басшыларына, әріптестер, ғалымдарға кеңес берген өте беделді адам болды. Біздің үйде әрдайым қонақтар көп болатын, әжем Жанбибі Ерғалиқызы оның мықты тірегі болды. Ол адамдарды тыңдап, өзіне қарата білді.

Конференцияның пленарлық отырысынан кейін академик Әбілқас Сағыновтың ескерткішіне гүл шоқтары қойылды.

Содан кейін ғылыми кеңес өтті.

Әбілқас Сағынов ҚарПТИ ректоры лауазымында 33 жыл бойы бір мезгілде пайдалы қазбалар кен орындарын игеру кафедрасының меңгерушісі болып жұмыс істеді. Еңбек жолын Қарағанды көмір бассейнінің шахталарында учаске бастығы лауазымынан бастаған, содан кейін бас инженер, шахта директоры, көмір трестінің техникалық бөлімінің басшысы болған. Тау-кен саласын одан артық ешкім білмеген сияқты. 1993 жылы Ғылым мен техника саласына қосқан зор үлесі, Қарағанды көмір бассейнін дамыту және халық шаруашылығы үшін кадрлар даярлағаны үшін Әбілқас Сағыновқа Қарағанды қаласының Құрметті азаматы атағы берілді. Оның КСРО мен республиканың халық шаруашылығын, жоғары білім мен ғылымды дамытудағы еңбегі бірнеше рет үкіметтік наградалармен — алты орденмен және медальдармен марапатталды. 1995 жылы оған "Қазақстан Республикасының еңбек сіңірген ғылым және техника қайраткері" атағы берілді.