Қарағандылықтарға "Жастар тәжірибесі" және "Алғашқы жұмыс орны" жобаларындағы өзгерістер туралы айтылды

Қарағанды облысында оқу орындарының түлектері мен NEET санатындағы өкілдердің жұмыссыздығы мәселесін "Жастар практикасы" және "Алғашқы жұмыс орны" жобаларының көмегімен шешеді. Осы жылы аталмыш бағыттар бойынша мыңға жуық адамды жұмыспен қамту жоспарланып отыр.

Аталған жобалардағы өзгерістер туралы Өңірлік коммуникациялар қызметінде өткен онлайн-брифингте айтылды.

— Біздің өңір жастары үшін негізгі әлеуметтік мәселе жұмысқа орналастыру болып табылады. Жұмыспен қамту үшін "Жастар тәжірибесі", "Алғашқы жұмыс орны", "Жасыл ел" бағдарламалары сияқты жобалар жұмыс істейді, — деп атап өтті жастар саясаты мәселелері басқармасының басшысы Біржан Әлімжанов.

Жастар практикасы уақытша жұмыс орындарын құру арқылы ұйымдастырылады. Ол практикаға орналастырылғанға дейін үш жылдан аспайтын және 29 жастан аспаған оқу орындары түлектерінің қатарындағы жұмыссыздарға арналған.

Жұмыс беруші үміткерлерді жұмысқа орналастыру үшін бірінші жұмыс орнын құрады. Жалақыны мемлекет субсидиялайды. Жобаның қатысушысы 29 жастан аспаған жастар, оның ішінде жұмыс тәжірибесі мен білімі жоқ NEET санатындағы жастар болып табылады.

— Биыл осы жобалардағы шарттар өзгертілді. Осылайша, "Жастар практикасына" қатысу ұзақтығы 6 айдан 12 айға дейін және еңбекақы мөлшері 25 АЕК-тен 30-ға дейін ұлғайтылды. 2022 жылы практикамен 721 адамды қамту жоспарлануда. "Алғашқы жұмыс орнында" да қатысу ұзақтығы 12 айдан 18 айға дейін және еңбекақыны субсидиялау мөлшері 20 АЕК-тен 30 АЕК-ке дейін ұлғайтылды. Осы жоба бойынша биыл 238 адам жіберуді жоспарлап отырмыз, — деді жұмыспен қамтуды үйлестіру және әлеуметтік бағдарламалар басқармасы басшысының орынбасары Мұхтар Төлеу.

Айтылған бағыттар бойынша жұмысқа орналасу үшін жұмыспен қамту орталықтарына немесе enbek.kz/ электрондық еңбек биржасына жүгіну қажет.

Естеріңізге сала кетейік, "Жастар тәжірибесі" мен "Алғашқы жұмыс орны" барлық меншік нысанындағы кәсіпорындар мен ұйымдарда ұйымдастырылады. Бұл ретте салық және әлеуметтік аударымдарды тұрақты жүргізетін, жалақысы бойынша берешегі жоқ және бір жылдан астам жұмыс істейтін жұмыс берушілер қатысуға жіберіледі.