Қарағандыда өткен съезде математика пәні мұғалімдері мектеп бағдарламасын жетілдіру туралы сөз қозғады

Қазақстанның 300-ден астам математик-мұғалімдері, жоғары оқу орындарының оқытушылары, әдіскерлері мен ғалымдары Қарағандыға «Мектептегі математикалық білім беру: жағдайы, проблемалары, ұсыныстар» атты республикалық съезіне жиналды. Іс-шара ҚР Білім және ғылым министрі Асхат Аймағамбетовтың қатысуымен өтті.

– Президент білім мен ғылымды дамыту бойынша өте маңызды міндеттер қойды. Техникалық мамандықтарды дамыту маңызды мәселелердің бірі болып табылады. Ал бұл ең алдымен математика, - деп атап өтті ҚР Білім министрі. – Сондықтан біз оқуға деген басқа көзқарас туралы айтуымыз керек. Шағымдар көп. Бір жағынан, сарапшылар мен тәжірибелі оқытушылар арасындағы қоғамдағы ескертулер әділетті. Біздің алдымызда математика пәні бойынша мектеп бағдарламасын жаңарту міндеті тұр. Бекітуге, қайталауға, сабақтастыққа уақыт болу үшін. Күрделі мәселе: бұл мектеп бағдарламасы, кадрлар даярлау, біліктілікті арттыру және мектеп оқулықтары.

Асхат Аймағамбетовтың айтуынша, математика пәні бойынша мектеп бағдарламасын өзгерту жұмыстары басталып кетті. Топ құрылып, оған тәжірибелі педагогтар, әдіскерлер мен жоғары мектеп өкілдері кірді. Жоспарда жаңартылған бағдарлама 2023 жылы пайда болады.

Съезде математиктер өздерінің әзірлемелерімен, инновациялық технологияларымен және оқыту құралдарымен бөлісті. Мектептегі математикалық білімнің мазмұны, оқушылардың оқу жетістіктерін бағалау, оқушылар олимпиадасы, байқаулар, ғылыми-жобалық зерттеулер және т. б. өзекті мәселелер талқыланды.

– Іс-шараның мақсаты – педагогикалық мамандықтың беделін арттыру және математика пәні мұғалімдерінің достастығын дамыту. Ұйымдастырушылар мұғалімдерге идеяларымен бөлісуге мүмкіндік беретін көптеген қызықты сәттерді дайындады. Әр мұғалім, сынып, мектеп ерекше. Тәжірибеге бағытталған тәсіл болуы керек, – деді Қарағанды облысының білім беруді дамыту оқу-әдістемелік орталығының директоры Бақытгүл Әбдікерова.

Сондай-ақ, оқытушыларды кадр тапшылығы, 10 және 11-сыныптардағы математика сағаттарының қысқаруы мәселесі толғандырады. 9-сынып оқушыларын қорытынды аттестаттауға дайындау үшін база жоқ. 5-ші және 6-шы сыныптағы бағдарламалық материал төртіншіге ауыстырылды. Бастауыш сынып мұғалімдері бұған дайын болмады.

Олимпиадаларға қатысты да сұрақтар жиналып қалды. Қазір олар жалпы форматта – физика-математикалық лицейлер үшін де, жалпы білім беретін мектептер үшін де өткізіледі. Қарапайым оқу орындарының оқушылары арнайы мектептермен бәсекеге түсе алмайды. Мұғалімдер олимпиаданы оқушылардың дайындық деңгейі бойынша бөлу дұрыс болар еді деп санайды.

– Өзекті мәселелердің бірі – мектепте оқу үшін қажет емес деп санайтын математика бөлімдерін енгізу. Бұл күрделі сандар, дифференциалдық теңдеулер және т. б., – дейді Алматы қаласының №166 лицейінің математика пәнінің мұғалімі Елена Штерн. – Бұл ЖОО бағдарламасы. Ал қазір бұл бөлімдер қорытынды аттестаттауда да, ҰБТ-да да бар. Сондай-ақ, аудандардағы дарынды балалар үшін тегін математика курстары құрылғанын қалаймын. Съезден кейін оң өзгерістер күтемін. Нақты міндеттер мен оларды шешу жолдары ұсынылғанын қалаймын. Біздің республикамыз бізде болған позицияларды қайтаруына үміттенеміз. Біздің балаларымыз сапалы білім алуы үшін әлемдегі ең жақсы білім болғанын қалаймыз.

Көптеген мұғалімдер съезге өздерінің тәжірибелерімен бөлісу үшін келді. Қарқаралыдан келген бастауыш сынып және математика пәнінің мұғалімі Дана Сыздықбаева «Математика біздің айналамызда» жобасын таныстырды.

– Біз бұл жоба бойынша үш жыл жұмыс істеп келеміз. Балаларға бүкіл өміріміз математикамен байланысты екенін түсіндіреміз. Балалар макеттерді жасау үшін есептеу жүргізу керектігін, математикасыз оны жүзеге асыру мүмкін еместігін түсінуілері қажет. Мектепте балалар бюджеттің негіздерімен танысуы үшін жәрмеңкелер өткізіледі. Бұл да математика. Бүгін мен өз жұмысымды көрсетіп, басқа әріптестерімнің еңбектерімен танысқым келеді. Әрине, сабақта жаңа идеяларды қолдану үшін өз дағдыларыңыз бен қабілеттеріңізді дамыту керек, – дейді Дана Сыздықбаева.

– Ал біз әріптестерімізге біздің мектепте жұмыс істейтін STEM-зертхана туралы айтқымыз келеді. Мұның барлығы – математика, инженерия, бағдарламалау, робототехника, 3D-модельдеу. Біз 3D-принтерде басылып, балалар жинаған түрлі бұйымдарды әкелдік. Өз жетістіктерімізбен бөлісеміз және болашақта сабақта қолданатын қызықты жобаларды атап өтеміз, – деді «Мұрагер» дарынды балалар мектебінің оқытушысы Тілеужан Қуандықова.

Съезге қатысушылар бір шешімге келді: балалардың математикаға деген қызығушылығын арттырып қана қоймай, педагогтердің кәсіби құзыреттілігін жоғарылату қажет.