2021 жылы 7,4 мыңнан астам қазақстандық skills.enbek.kz платформасында оқудан өтті
Өткен жылдың шілде айында skills.enbek.kz онлайн режимде кәсіптік оқыту платформасы (бұдан әрі – Платформа) іске қосылған сәттен бастап 7,4 мыңнан астам азамат, оның ішінде 5,4 мың жұмыссыз қысқа мерзімді оқудан өткені туралы сертификат алды. Платформада 13,4 мың қазақстандық тіркелді.
Бұл ретте 5,4 мың жұмыссыз азаматтың 2,3 мыңы – негізінен Қызылорда, Батыс Қазақстан, Түркістан, Атырау және Ақтөбе облыстарының жастары.
Іске қосылған сәттен бастап платформада әртүрлі бағыттар бойынша 100-ден астам курстар жарияланды, олардың 58-і – тегін. Ұзақтығы 1-ден 72 сағатқа дейін.
2021 жылы «Жұмыскерлерді басқару», «Сүтті ірі қара өсіру», «Кассир», «Құлпынай өсіру қыр-сырлары» және «Ұннан жасалған кондитер өнімдері, жіктелуі дайындалу технологиясы» сынды бағыттар сұранысқа ие болды.
«ЕРДО» АҚ президенті Дәулет Арғандықовтың айтуынша, ағымдағы жылдың қаңтар айында тіркелген 649 пайдаланушы мен сертификат алған 110 білім алушы жұмыспен қамтамасыз етілді. Сонымен қатар, жұмыссыз адамдарды мемлекеттік қолдау аясында биыл 20 мың адамды онлайн режимде кәсіби оқытумен қамту жоспарланып отыр.
skills.enbek.kz платформасы жалпы ел халқының білім деңгейі мен кәсібилігін арттыруға, мансаптық дамуды ынталандыруға және «өмір бойы оқыту» тұжырымдамасын ілгерілетуге бағытталған.
Оқуға тікелей https://skills.enbek.kz/ сілтемесі арқылы немесе enbek.kz электрондық еңбек биржасында «Онлайн оқыту» бөлімін таңдау арқылы өтуге болады.
Платформада білім алушы оқытудың қолайлы қарқынын, оқыту тілін және материалды берудің ыңғайлы қағидатын өз бетінше таңдайды. Оқу процесінде білім алушы өзінің оқу жетістіктерінің прогресін бақылай алады.
Оқу аяқталғаннан кейін білім алушы 70% шекті деңгеймен тестілеу тапсыруы тиіс. Онлайн курсты сәтті аяқтаған жағдайда дағдыларды игеру туралы сертификат беріледі. Курсты аяқтаудың міндетті шарты – студент тарапынан курсты бағалау.
Бұл сертификат enbek.kz электрондық еңбек биржасында тіркелген кезде білім алушы жасаған түйіндемеде автоматты түрде көрсетіледі. Бос жұмыс орындарын іздеу кезінде әлеуетті жұмыс беруші skills.enbek.kz-те сәтті оқудан кейін алынған сертификаттарды көретін болады.
Онлайн курстарды жасаушылар платформада автор ретінде тіркеле алады. Авторлар мен әзірлеушілер үшін платформада онлайн курстарды орналастыру тегін. Курстарды құруға арналған құралдарды қолдану өте оңай.
Ұсынылатын онлайн курстардың ұзақтығы 6-дан 144 сағатқа дейін. Курстарда ақпаратты ұсынудың әртүрлі форматтары болуы тиіс: мәтін, презентациялар, бейне және аудиоматериалдар, инфографика және басқа да түрлері. Сондай-ақ курстар мемлекеттік және орыс тілдерінде орналастырылуы мүмкін. Платформа ерекше қажеттіліктері бар студенттер үшін интерфейсті бейімдеу мүмкіндігін ұсынады.
skills.enbek.kz платформасында тіркелу және жұмыс істеу бойынша барлық сұрақтар бойынша «ЕРДО» АҚ жауапты қызметкерлерімен төмендегі нөмірлер бойынша байланысуға болады: (8-7172) 95-43-17 (ішкі. 877, 878).
ҚР Еңбек және халықты әлеуметтік қорғау министрлігінің ақпараты бойынша