Қарағандыда жедел медициналық жәрдем қосалқы станциясы ашылды
Қарағандыда жедел медициналық жәрдем қосалқы станциясының құрылысы аяқталды. Ол Майқұдық тұрғындарына қызмет көрсетеді.
Жаңа қосалқы станцияның ауданы 1 300 шаршы метрден асады. Негізгі ғимаратта диспетчерлік бөлме, қызметкерлердің демалыс бөлмелері орналасқан, сондай-ақ жедел жәрдем машиналарын жөндеуге арналған ангар мен гараждар көзделген. Жаңа ғимаратта 146 адам, 11 бригада жұмыс істейді. Олар жылына 25-тен 50 мыңға дейін қоңырау қабылдай алады.
– Бүгін бізде жақсы оқиға – біз жаңа қосалқы станция ғимаратына көшудеміз. Бұған дейін ол Гвардейская көшесіндегі ескі ғимаратта болған, – дейді облыстық жедел медициналық жәрдем станциясының директоры Зулфикар Әбілқасымов. – Қосалқы станция типтік, барлық стандарттарға сәйкес келеді. Қызметкерлер үшін барлық жағдай жасалған: жайлы демалыс бөлмелері, автожуу, жөндеу цехтары, ұсақ жөндеуге арналған жабдықтар. Сондай-ақ, облыс әкімдігі біздің қосалқы станцияға пациенттерді тасымалдау үшін төрт автомобиль сыйға тартты.
Айта кету керек, қазіргі уақытта болашақта Пришахтинск және Сұрыптау тұрғындарына қызмет көрсететін тағы бір қосалқы станцияның құрылысы аяқталуда.