Бірінші толқын: Қарағандыда COVID-19 пандемиясының басталуы туралы фильмнің жабық көрсетілімі өтті

Қарағандыда COVID-19 пандемиясының басталуы туралы "Бірінші толқын" атты толық метражды көркем фильмнің ресми тұсаукесері өтті. Драма нақты оқиғаларға негізделген және коронавирустан қайтыс болғандарға арналған.

Лентаны Қарағанды облысы әкімдігінің қолдауымен Saryarqa телеарнасы және Armanfilms киностудиясы түсірді. Фильмнің продюсер әрі сценаристі телеарна басшысының орынбасары Жәнібек Садықанов болды. Сценарий бойынша онымен бірге Дмитрий Белугин жұмыс істеді. Фильмнің қоюшы-режиссері Арман Әлімжанов.

Картина бойынша жұмыс сегіз ай бойы жалғасып, Қарағанды мен облыстың әртүрлі жерлерінде жүргізілді. Бұл медициналық мекемелер, полиция бөлімшесі және қарапайым Майқұдық аулалары. Түсірілімге тек Қарағанды облысының тұрғындары – кәсіби және кәсіби емес актерлер қатысты. Кастингке 300-ден астам адам қатысты.

– Мен бұл жобаға қатысқаныма өте қуаныштымын. Мен сұлулық саласында жұмыс істеймін, бірақ бала кезімнен актриса болуды армандадым. Бір жарым жыл бұрын Қарағандыда актерлік шеберлік курсын бітірдім. Түсірілімге өте жауапкершілікпен қарадым, рөлге толықтай шомып кеттім десем болады, – дейді фильмде волонтерлер жетекшісінің рөлін ойнаған Наргиз Аркенова.

Картинада коронавирустың алғашқы толқыны кезінде көптеген қарағандылықтардың тап болған сынақтары туралы баяндалады. Көркем фильм деректі хроникамен үйлестірілген.

– Пандемия менің отбасыма да әсер етті. Әжем мен тәтем қайтыс болды. Мен жақындары мен туыстарынан айрылған көптеген адамдарды білемін. Кейіпкерлер жай ғана пайда болған жоқ. Сценарийді жаза отырып, мен барлығына жаным ашып, қиындықтарды олармен бірге өткергендей болдым. Мен өзімнің осы жұмысымды жақындарын жоғалтқандарға және қайғы кешкендерге арнаймын, – дейді сценарист Дмитрий Белугин.

Режиссер Арман Әлімжановтың айтуынша, бұл бізбен бірге тұратын қарапайым адамдар туралы фильм. Пандемияға қатысты барлық жағдай бұл жалғанда адам өмірі мен әрбір адам қандай екенін көрсетті.

– Біз күнделікті өмірдегі адамдардың проблемалары туралы айтып отырмыз, – дейді ол. – Бұл ретте олардың ең өзекті мәселелерін қозғаймыз. Бас кейіпкер Қарағандының үлкен аудандарының бірі Майқұдықта әкесіз өседі. Мен өзім осы ауданнан шыққанмын және не жайлы айтып отырғанымды түсінемін. Біз қылмыстық бейімділігі бар көшедегі жігіттің қалай өзгеріп, дұрыс жолды таңдайтынын көрсеткіміз келді.

Фильм ең қызықты жерде аяқталады. 2022 жылы сериал түрінде шығады. 8 серия шығару жоспарлануда. Әзірге картинаның үлкен экрандарда көрсетілуі үшін оны тіркеуге арналған құжаттар ҚР Мәдениет және спорт министрлігіне жолданды.