Абай атындағы кітапханада ашылған кітап көрмесі Қарағанды облысының тарихы жайлы сыр шертеді

Абай атындағы Қарағанды облыстық балалар кітапханасында «Рухани жаңғыру – ұлт жаңғыруы» атты кітап көрме-репортажы өтуде.
- Біздің оқырмандар «Рухани жаңғыру» кітаптар сериясымен таныса алады. Мысалы, «Мұражай және тарих» атты жинақ облыстық тарихи-өлкетану мұражайының құрылуы және дамуы туралы айтып береді. «Сарыарқаның тарихи-мәдени мирасы» атты ғылыми каталог оқырмандарды көптеген жылдар бойы Қарағанды облысының аумағынан жиналған мұражайдың ескі құнды жәдігерлерімен, қолөнер туындыларымен таныстырады, - дейді әдістемелік бөлім жетекшісі Сәуле Жүсіпова.
Сондай-ақ көрмеде оқырмандар «Туған жер - тұғырың» деген фотоальбомды тамашалай алады. Онда еліміздің көрнекті жерлерінің суреттері жинақталған: ежелгі киелі ескерткіштерден бастап Астанадағы қазіргі заманғы сәулет құрылыстарына дейін.
Экспозицияда қазақ тілі графикасы мен латын әрпіне ауысу тарихы туралы, Егемен Қазақстан туралы кітаптар ұсынылады.
«Рухани жаңғыру – ұлт жаңғыруы» кітап көрмесі жыл соңына дейін Абай атындағы балалар кітапханасында Бұқар жырау даңғылы, 30 мекенжайы бойынша өтеді.