Қарағандыда «Қазыналы Қарағанды» кітап-альбомының тұсаукесері өтті

«Рухани жаңғыру» бағдарламасы аясында Қарағанды қаласында «Қазыналы Қарағанды» кітап-альбомының тұсаукесері өтті. Бұл Қарағанды қаласының 85 жылдығына арналған қала тарихы туралы кітап.

Кітаптың тұсаукесері М. Әуезов атындағы кітапханада өтті. Мұнда облыстық бейнелеу өнері мұражайы қорынан Қарағанды туралы суреттер көрмесі ұйымдастырылды. Онда суретшілер Мыңғыш Әбілқасов, Сергей Щеголихин, Бейбіт Мұстафин, Андрей Перминов пен Олег Дроздовтың жұмыстары ұсынылды.
Тұсаукесерге қаланың құрметті сәулетшісі Сергей Лебедев, Қарағанды облысы Мемлекеттік мұрағатының ғылыми-техникалық құжаттама жөніндегі директоры Темірғали Аршабеков және ақын Қайрат Асқаров қатысты.
- Кітап 300 беттен тұрады. Ол өте қызықты және танымдық болды. Онда қаланың қалыптасу тарихы мен қазіргі заманғы Қарағанды туралы көптеген фотосуреттер мен фактілер жинақталған. Сондай-ақ белгілі жерлестер туралы материалдар да бар. Кітап үш тілде: қазақ, орыс және ағылшын тілдерінде жазылған, - дейді облыстық бейнелеу өнері мұражайының ғылыми қызметкері Назерке Жартын.
«Қазыналы Қарағанды» кітап-альбомын құрастырушы-авторлары Қарағанды облысы Мемлекеттік мұрағатының ғылыми-техникалық құжаттама жөніндегі директоры Темірғали Аршабеков және Қарағанды қаласының орталықтандырылған кітапхана жүйесінің директоры Гүлжан Ахметкаримова болып табылады.
- Кітап жасауға бізде бір жылға жуық уақыт кетті. Кітап 30-шы жылдардан бүгінгі күнге дейін Қарағанды туралы әңгімелейді. Біздің басты мақсатымыз осы басылымның көмегімен оқырмандарды, әсіресе шетел туристерін Қарағанды тарихымен таныстыру болды, - дейді автор Темірғали Аршабеков.
Қарағанды туралы «Қазыналы Қарағанды» кітап-альбомы кітапханаларда таратылады. Жинақтың бастапқы тиражы – 500 дана.